Vasina estoke Pfizer 6.930 doze sei iha armajen SAMES
DILI, 20 janeiru 2023(TATOLI) – Diretór Ezekutivu, Servisu Autónomu no Medikamentu Ekipamentu Saúde (SAMES), Santana Martins, informa vasina Covid-19 iha estoke Pfizer hamutuk 6.930 dozes iha armazen.
“Iha vasina Covid-19, oras ne’e daudaun, ita iha vasina Pfizer hamutuk 6.930 doze mak oras ne’e ita armazena iha SAMES”, Diretór Ezekutivu SAMES, Santana Martins, dehan iha nia servisu fatin, ohin.
Nia hateten vasina Pfizer rasik sei espira iha fulan maio tanba ne’e husu ba populasaun sira karik seidauk simu vasina bele hakbesik-an ba fasilidade saúde sira ne’ebé mak besik tanba vasina mak sei hasae imunidade hodi kontra moras Covid-19.
“Entaun atividade vasina ne’e Ministériu Saúde enkaixa ba vasina imunizasaun integrada hodi populasaun sira bele simu no hasae imunidade”, diretór hateten.
Diretór subliña vasina Sinovac sei iha maibé depende ba vontade ema nian katak hakarak uza Pfizer ka vasina Sinovac, ida ne’e fasilidade saúde mak tenke jere.
“Agora vaisna Astrazeneca, daudaun ne’e ita la iha ona estoke”, afirma nia.
Tuir dadus husi Ministériu Saúde iha loron 18 janeiru 2023 katak populasaun iha teritóriu nasionál ne’ebé simu ona vasina Covid-19 hamutuk 1,904,894 no totál kazu Covid-19 hamutuk 23,407, totál rekopera hamutuk 23,257, totál teste 284,805 no totál óbitu hamutuk 138.
Jornalista : Felicidade Ximenes
Editór : Zezito Silva
