Kameli Timor International School harii atu kuidadu labarik sira
DILI, 21 janeiru 2023 (TATOLI)—Ministériu Edukasaun Juventude no Desportu (MEJD) liuhosi Servisu Edukasaun Munisipiu Dili, sábadu ne’e, halo abertura prosesu aprendizajen tinan letivu 2023 ho atividade inagura eskritóriu Kameli Timor International School ne’ebé lokaliza iha suku Comoro, postu administrativu Dom Aleixo, munisípiu Dili.
Kameli Timor International School ne’e harii iha fulan-novembru 2022, ho objetivu atu kuidadu labarik sira hahú hosi fulan-haat to’o tinan neen (6).
Reprezentante Servisu Edukasaun Munisípiu Dili, Mariano Joaquim da Cruz, hateten inisiativa sidadaun ida harii eskola ne’e di’ak tebes maibé tenke kumpre prosedimentu legál sira hodi hetan vistu hosi Ministériu Edukasaun Juventude no Desportu (MEJD), liu-liu Servisu Edukasaun Munisípiu Dili.
“Timor-Leste nu’udar Estadu nakloke ba hotu-hotu, ba sidadaun ne’ebé iha inisiativa di’ak atu dezenvolve nasaun ida-ne’e liuhosi edukasaun, parte MEJD sempre apoia. Tanba ne’e mak ami marka prezensa hodi fó apoiu másimu maibé edukasaun mós iha regulamentu rasik. Katak, tenke rejistu tanba iha kritériu lubuk ida-ne’ebé sira tenke prenxe,” Reprezentante Servisu Edukasaun Munisípiu Dili ne’e hateten iha ámbitu abertura prosesu aprendizajen, iha Comoro.
Informasaun ne’ebé hosi entidade fundadór katak sira foin hetan de’it lisensa hosi Servisu Rejistu no verifikasaun Emprezariál, Institutu Públiku (SERVE, I.P), entaun ninia kontinuasaun ne’e tenke enkamiña ba MEJD liu-liu ba Servisu Eukasaun Munisípiu Dili, tanba área kontrolu ne’e iha área Munisípiu Dili nian, nune’e bele kontrola no tau matan
Ministériu Edukasaun Juventude no Desportu (MEJD) liu-liu Servisu Edukasaun Munisípiu Dili rejista eskola Internasionál iha Dili inklui Kameli Timor International School ne’e hamutuk 12.
Diretora Kameli Timor International School, Rini Alves da Cruz, hateten objetivu harii eskola ida ne’e nu’udar uma daruak ba labarik sira no hakarak haburas liután kultura Timór nian ho sistema Internasionál no hakarak estudante sira-ne’ebé mak mai iha ne’e atu sai independente katak labarik kiik-oan sira bele halo mesak.
Eskola ne’e simu labarik ho idade hosi fulan-haat to’o tinan rua (2) no matéria ba hanorin ne’e mak oinsá labarik sira bele halimar mesak, oinsá sira bele tau sira-nia sapatu mesak, oinsá sira bele ba haris no sintina mesak.
“Matéria ne’ebé ami uza matéria Internasionál nian, maibé kurríkulu uza Timór nian. Insiativa mai hosi ha’u rasik no maluk feto ida, ami hakarak kuidadu labarik sira-ne’ebé hanesan futuru nasaun nian. Eskola refere foin hahú iha fulan-novembru 2022,” nia dehan.
Bebe fulan-haa (4)t to’o tinan rua (2) iha kategoria days care, tinan rua (2) to’o tinan haat (4) kategoria play group, tinan haat (4) to’o tinan neen (6) kategoria kinder garden no tinan neen (6) kategoria grade one, no daudaun ne’e bele simu to’o grade two.
“Daudaun ne’e iha estudante hamutuk 14. Kada fulan selu mínimu $80 no másimu $180. Esperansa ba oin hakarak estudante barak liután no enjoy ho fatin ka uma daruak ba sira ho kontente,” nia dehan.
Atividade prosesu aprendizajen ne’e hahú ho misa agradesimentu, ne’ebé partisipa maioria hosi inan-aman hosi estudante sira.
Jornalista : Antónia Gusmão
Editór : Cancio Ximenes
