DILI, 22 janeiru 2023 (TATOLI) – Voluntáriu ba Korpu Pás nain-19 hosi Estadu Unidus Amerika (EUA) nain-19 fila hikas mai Timor-Leste ho aviaun Citilink, ne’ebé simu diretamente husi Diretór Korpu ba Pás, Jamie Fouss, iha Airoportu Internasional, Comoro.
Voluntáriu sira ne’e sei koopera ho manorin Lian Inglés no parseiru sira iha setór ekonómiku hodi serví komuniade sira iha Bobonaru, Ermera, Liquisá no Manatutu, tuir pedidu Governu Timor-Leste nian.
Korpu ba Paz mós sei apoia inisiativa Prezidente Repúblika Ramos Horta kona ba hadi’a nutrisaun no responde ba ra’es badak, liu husi projetu sekundária sira.
Hanoin hikas katak voluntáriu hirak ne’e husik Timor-Leste iha tinan 2020, wainhira Kovid-19 mosu dahuluk iha Timor-Leste.
Diretor Korpu ba Pás hatudu nia felisidade ho prezensa membru voluntáriu hirak ne’e hodi kontribui ba dezenvolvimentu nasaun nian.
“Ami kontente tebes atu simu fali voluntáriu sira ne’e iha Timor-Leste. Korpu ba Pás orgullu tebes ho istória parseria ne’ebé naruk iha Timor-Leste, ne’ebé mai husi tinan 2002 bainhira voluntáriu Amerikanu sira foin primeira-vez mai iha Timor-Leste hodi apoia dezenvolvimentu komunidade Timor nian”, hatete Jamie Fouss, liuhosi Komunikadu ne’ebé TATOLI aseseu iha Domingu ohin.
Diretor ne’e konta, desde tinan 2002, timoroan rihun ba rihun mak sai ona benefisiáriu ba atividade hirak ne’ebé promove husi membru voluntáriu Korpu ba Pás iha Timor-Leste, liu-liu iha área dezenvolvimentu ba empregu no empregabilidade no mos kapasitasaun dalen Inglés ba timoroan sira – “nu’udar abilidade ne’ebé esensiál tebes atu promove Timor-Leste nia prosperidade ekonómika”, turi dirijente ne’e.
Nia esplika mos iha komunikadu ne’e katak, maske voluntáriu sira husi Korpu ba Páz tenki sai husi Timor iha tinan 2020 tamba propagasaun virus korona iha país ne’e, Korpu ba Pás iha Timor-Leste servisu hamutuk ho Governu no parseiru lokál sira hodi kombate COVID-19.
Nia fo ezemplu kona ba apoiu hirak ne’ebé Korpu ba Paz iha Timor-Leste halo mak: Tradusaun informasaun sira kona ba prevensaun kovid-19 husi lian inglés ba dalen lokal sira no apoia Equipa vasinasaun Ministériu Saúde ho veíkulu, morotista no pesoál médiku hodi administra vasinasaun ba labarik estudante rihun ba rihun.
Korpu ba Pás mós suporta formasaun lian Inglés iha munisípiu oinoin no semináriu sira kona-ba dezeñu no jestaun projetu ba ONG lokál sira, Governu lokál no grupu foin-sa’e sira.
Korpu ba Pás nu’udar rede servisu internasionál ba voluntáriu sira, membru komunidade sira, parseiru nasaun uma-nain sira no pesoál sira ne’ebé lidera husi ajénsia nia misaun ba páz no amizade mundiál nian.
Ho konvite husi Governu sira iha mundu tomak, voluntáriu sira husi Korpu ba Pás servisu hamutuk ho membru komunidade sira iha projetu sira ne’ebé mak prioritiza iha área edukasaun, saude, ambiente, agrikultura, dezenvolvimentu ekonómiku komunitáriu no dezenvolvimentu foin-sa’e sira.
Liuhosi servisu ne’e, membru sira husi rede Korpu ba Pás dezenvolve abilidade transversável no halibur kompeténsia interkulturál ne’ebé tau dezde Prezidente John F. Kennedy harii Korpu ba Páz iha tinan 1961, ema Amerikanu 240,000 liu servi ona iha nasaun hamutuk 142.
Jornalista: Natalino Costa
Editór : Zezito Silva
