iklan

HEADLINE, SEGURANSA

Evita konfrontu komandante sei bolu responsável GAM no GAR

Evita konfrontu komandante sei bolu responsável GAM no GAR

Komandante Polísia Nasionál Timor-Leste (PNTL), Munisípiu Dili, Superintendente Xefi, Natercia Martins. Imajen Tatoli/Francisco Sony

DILI, 24  janeiru 2023 (TATOLI) – Komandante Polísia Nasionál Timor-Leste (PNTL), Munisípiu Dili, Superintendente Xefe, Natercia Martins, sei bolu lider Grupu Arte Marsiál (GAM) no Grupu Arte Rituál (GAR) atu husu esplikasaun kona-ba konfrontu sira iha kapitál.

“Komandu fó ona orden katak presiza bolu komandante eskuadra sira, lider hosi arte marsiál no lider hosi arte rituál sira atu tur hamutuk hodi koalia, tanba sa maka sira nia membru sira sempre envolve iha aktus krimi ka ataka malu, depois ema ne’ebé la sala mós sai vítima, entun atu rezolve situasaun ida ne’e ita tenke servisu hodi toma responsablidade, la’os halo tiha problema maibé depois sira subar sira nia aan iha kotuk ne’e la’os”, Komandante Polísia Nasionál Timor-Leste (PNTL), Munisípiu Dili, Superintendente Xefe Natercia Martins, dehan ba jornalista sira iha Sentru Formasaun Polísia (CFP, sigla portugés) Comoro, tersa ne’e.

Nia dehan presiza kooperasaun atu bele garante duni situasaun ne’ebé seguru ba ema hotu atu halao sira nia atividade loroloron nian, sem ameasa, sem tauk, iha dader, meiudia no kalan, ne’e presiza ema hotuhotu ninia kolaborasaun.

Komandante Natercia Martins husu inan ho aman  hodi kontrola oan sira ne’ebé idade minoridade.

Tuir dadus ne’ebé komandu simu katak labarik sira ne’ebé envolve iha konfrontu ne’e maioria ho labarik idade 16 to’o 20.

“Labarik sira ne’e responsablidde hosi inan no aman atu kontrola oan sira, se bá eskola ka sai eskola nia bá ne’ebé, kalan nia sai ba ne’ebé, nia ransu ho se, ne«e inan aman nia responsablidade”, salienta nia.

“Iha ha’u nia tempu kuandu toman tán labarik ho idade minoridade maka envolve krime, inan no aman sira maka ha’u sei haruka bolu atu ezije sira nian responsablidade hanesan inan no aman atu kontrola oan sira”, katak nia.

Natercia hatutan, ”Timór ita nian rai, ita maka tenke tau liman hamtuk atu asegura ita nian rain, se la’os ita, entaun se”.

“Agora polísia uza ibun hodi koalia fó hatene, se ida ne’e labele ona, imi kria situasaun sira hanesan ne’e polísia hakarak uza forsa, polísia bele uza forsa no uza forsa iha kualker tempu, maibé ha’u hateten katak uza forsa ne’e la’os ba inimigu, ba ita nia oan sira de’it, imi hakarak polísia atu uza, ha’u hanoin labele” komandante hakotu.

Jornalista: Natalino Costa

Editór : Zezito Silva

iklan
iklan

One Comment

  1. Di’ak liu husu ba ukun-na’in sira-ne’ebé deside reativa sasán sira-ne’e. Sira dehan katak ho reativasaun bele rezolve problema sira-ne’e, maibé la hatene halo kontrolu ida di’ak no saida maka akontese? Balun até halo retórika barata dehan katak sira-ne’e parseiru Governu nian, nune’e prevee tan osan iha OGE atu halo sasán sira-ne’e nia sede, enkuantu eskola barak nia kondisaun sei mukit los. Ha’u-nia pergunta de’it, karik Governu taka duni buat sira-ne’e, serake Timor-ne’e la ba oin? tuir haú-nia hanoin, pelo kontráriu.

Leave a Reply

iklan
error: Content is protected !!