iklan

HEADLINE, SEGURANSA

FM husu kontrola arma

FM husu kontrola arma

Kilat PNTL, Imajen/Antonio Goncalves

DILI, 24 janeiru 2023 (TATOLI) – Diretór Ezekutivu Fundasaun Mahein (FM), Abel Amaral husu ba Estadu atu kontrola arma fogu iha Timor-Leste, nune’e prevene ema sivíl labele kaer kilat.

“Fundasaun Mahein, dada atensaun públiku atu sujere ba Estadu tenke iha meiu espesífiku balun ne’ebé bele haforsa kontrolu kilat no garante seguransa sidadaun Timor-Leste”, Diretór Ezekutivu Fundasaun Mahein (FM), Abel Amaral, fó sai liuhosi komunikadu ne’ebé maka TATOLI asesu, ohin.

Timor-Leste enfrenta hela problema polítika, ekonómika no povu barak falta asesu ba infraestrutura bázika, servisu, ekonomia no nutrisaun ne’ebé adekuadu.

Tanba ne’e iha peritu barak hanoin katak mundu agora tama iha resesaun ekonómika. Estadu Timor-Leste nia pozisaun finanseira la sustentável, bainhira lidér polítiku sira propoen atu sosa tan kilat ba forsa seguransa sira, maibé sira nunka esplika oinsá ida ne’e sei rezolve nesesidade urjente povu nian ka rezolve Timor-Leste nia problema ekonómiku ka polítiku fundamentál sira.

“Nune’e mós forsa seguransa nia disiplina no prátika kontrola arma fraku hela, tanba ne’e, Governu aumenta númeru kilat iha rai-laran, husi ami nia haree ne’e ameasa ba sidadaun Timor-Leste nia moris no seguransa, bainhira kilat kontinua lakon ba beibeik, ema ruma bele uza hodi instabiliza nasaun hanesan akontese iha 2006”, lamenta nia.

Nia informa Governu tenke reativa Komisaun Investigasaun Arma hodi estabelese sistema atu halo audit annuál ba arma de fogo (kilat), kobre forsa seguransa no mós ema sivíl, presiza duni audit sira ne’e atu bele determina kilat hira maka sirkula iha rai-laran ho tipu no kondisaun oinsá.

“Iha audit (auditoria) ne’e bele deteta kilat ilegál no asegura katak ema ne’ebé subar kilat ilegál tenke hetan penalidade”, afirma nia.

Tanba ne’e, FM sujere ba Prezidente Repúblika maka tenke inisia no dirije prosesu ida ne’e, tenke envolve instuisaun Estadu no naun Estadu relevante hotu, hanesan forsa seguransa, ministériu relevante sira (Interiór, Defeza), PDHJ, KAK no sosiedade sivíl atu halo auditoria ne’ebé envolve asaun konkretu, inklui disiplinaria no legál hodi garante katak regra no prosedimentu liga ho kontrola arma.

“Ami husu beibeik polítika nain sira atu kria polítika seguransa nasionál ida atu guia desizaun aprovizionamentu (sosa) kilat ba tempu naruk, tanba ne’e estratejia aprovizionamentu arma nu’udar parte polítika seguransa nasionál tenke bazea ba avaliasaun nesesidade no kapasidade ajénsia seguransa sira nian, inklui kapasidade atu kontrola arma bazea ba regra no prosedimentu atuál sira”, hateten nia.

Nia hatutan bainhira Governu atu sosa kilat, tenke bazea ba polítika seguransa nasionál, la’os pedidu husi lidér ajénsia seguransa ka polítiku sira, tanba ne’e deputadu husi Parlamentu Nasionál no membru públiku tenke envolve másimu iha debate ba polítika seguransa nasionál.

Aleinde ne’e Governu tenke kria kompañia estatal ho rekoñesimentu internasionál atu halo aprovizionamentu arma, tuir polítika seguransa nasionál, ida ne’e bele garante katak aprovizionamentu arma ne’e transparente no livre husi intervensaun polítika.

“Agora daudaun, ami seidauk haree lei ruma ne’ebé regula ema sivíl rai kilat, tanba ne’e, Governu no parlamentu presiza kria lei foun hodi regula ema sivíl uza no rai kilat, inklui kria prosesu rejistrasaun ida ba kilat kiik ka kilat manu atu bandu ema sivíl la presiza iha kilat”, rekomenda nian.

Tanba iha evidénsia barak hatudu katak kilat manu barak tama ilegál mai Timor-Leste liuhosi fronteira Indonéza, maske maioria kilat ne’e ema uza atu kasa animál, maibé kilat ne’e bele mós tiru mate ema, tanba ne’e, importante ba PNTL no F-FDTL halo esforsu boot atu prevene no deteta kilat ilegál tama iha Timor-Leste no subar iha ema nia uma.

“Ami nia monitorizasaun hatudu katak lidér PNTL no F-FDTL falla totál atu implementa regra no prosedimentu kontrola arma no ida ne’e provoka kazu grave barak ne’ebé komete husi membru ajénsia seguransa, inklui tiru mate ema no animál, ami ezije komandu PNTL no F-FDTL tenke responsabiliza ba fallansu ne’e no ami husu ba Parlamentu Nasionál atu halo investigasaun kona-ba kazu mal-prátika arma ne’ebé akontese beibeik no membru ne’ebé responsável tenke hetan penalidade tuir lei”, Diretór Ezekutivu haktuir.

Nia dehan bainhira ofisiál Estadu abuza nia pozisaun, ida ne’e hafraku Estadu direitu (Rule of Law), tanba hatudu ba públiku katak ofisiál la tauk atu viola regra.

“Bainhira ita moris ou Rule of the Deal no konesaun pesoál dúke Rule of Law, ida ne’e viola tiha prinsípiu Konstituisaun RDTL, Impunidade elite influénsia ba sosiedade no enkoraja dezorden, violénsia no inseguransa, tanba ne’e, ofisiál atuál no eis-ofisiál ne’ebé subar kilat ilegál tenke hetan penalidade tuir lei”, tenik nia.

Hatan kona-ba  kestaun ne’e, iha fatin ketak, Komandante Jerál PNTL, Komisáriu Faustino da Costa, hateten ekipa auditoria ba arma iha Timor-Leste ne’e antes ne’e forma ona ekipa bo’ot ida mak halo hela servisu ba ida ne’e.

“Ekipa auditoria ne’e evolve komisaun B PN, ekipa fiskalizasaun ne’ebé iha ekipa boot ida, tanba PNTL tempu saida de’it bele halo auditoria, importante tenke tuir nia dalan laos ema hotu hotu hakarak mai atu hatene fali insitutisaun PNTL ne’e iha kilat hira ne’e proibidu atu fó sai ida ne’e segredu Estadu”, Hakotu nia.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!