iklan

HEADLINE, SAÚDE

MS-OMS-UNFPA lansa projetu pilotu ba teste rápidu HIV/SIDA

MS-OMS-UNFPA lansa projetu pilotu ba teste rápidu HIV/SIDA

Ministériu Saúde hamutuk ho parseiru internasionál UNFPA no Organizasaun Mundiál Saúde (OMS) hala'o lansametu ba projetu Profilaksia no pre-ekspozisaun no hala'o demostrasaun auto teste HIVST ba key populasaun iha Timor-Leste, iha Edifísiu Asosiasaun Komunidade Progresu-KP, Palapasu Dili, tersa (24/01). Imajen Tatoli/Francisco Sony

DILI, 24 janeiru 2023 (TATOLI) – Minsitériu Saúde (MS) hamutuk ho Organizasaun Mundiál Saúde (OMS) no Fundu Populasaun Nasaun Unida (UNFPA) halo lansamentu ba projetu pilotu ba teste HIV ba an rasik no prevensaun profilaksia pre-expozisaun HIV/SIDA.

“Serimónia ba lansamentu primeiru projetu ba teste HVI ho parseiru internasionál sira. Ida ne’e asaun teste HIV/SIDA ba an rasik nu’udar meiu médiku ida-ne’ebé bele sedu deteta it-nia an rasik karik ita kontajiadu ona ho moras ne’e. Nune’e mós bele halo ona intervensaun atempada liuhosi profilaksia pre-Expozisaun”, Vise Ministru Saúde, Bonifacio ‘’Maucoli’’ dos Reis dehan iha nia diskursu bainhira halo lansamentu profilaksia pre-ekspozisaun (PrEP) no inisiativa demostrasaun auto teste HIV/SIDA (HIVST) entre Key-Population sira iha Timor-Leste iha edifísiu Asosiasaun Komunidade Progressu, Palapasu, ohin.

Profilaksia Pre-Expozisaun maka nu’udar estratejia ba prevensaun HIV/SIDA nian ida-ne’ebé utiliza medikamentu Antiretroviral (Tenofovir) ne’ebé sei redúz posibilidade infesaun HIV besik ba zero bainhira utiliza konsistente husi ema ne’ebé HIV negativu. Estratejia ida ne’e la’os ho intensaun atu troka estratejia prevensaun seluk ne’ebé agora daudaun eziste, maibé sai nu’udar opsaun ba prevensaun ida.

“Teste an rasik ba HIV ka teste rápidu ba HIV nu’udar teste ida-ne’ebé mak fasil liu ba ita hotu, maibé presiza tuir instrusaun ho didi’ak nune’e rezultadu bele hatene iha minutu 20 nia laran. Teste ne’ebé la presiza koñesimentu espesializadu, tanba foti husi ita-nia kabén “Saliva, air liur” nu’udar fluidu oral ba teste,” Nia esplika.

Nia dehan hapara no kombate moras HIV/SIDA liuhosi prevensaun primária, sekundária no tersiária iha Timor-Leste, nu’udar parte husi programa prioridade VIII Governu Konstitusionál no mós meta ida husi Objetivu Dezenvolvimentu Sustentável, ne’ebé rekere implementasaun komprensivu no kombinadu ba intervensaun sosio-ekonómiku-kulturál tanba multi-aspetu ne’ebé presiza parte relevante hotuhotu ninia partisipasaun hodi bele hapara moras HIV-SIDA.

Timor-Leste hamutuk ho estadus membrus sira seluk, iha kompromisu boot atu hakotu HIV nu’udar prioridade polítika globál, ne’ebé tinan-tinan sempre diskute iha Sesaun Asembleia Mundiál Saúde no iha Sesaun Komisaun Rejionál husi rejiaun ida-idak husi Organizasaun Mundiál Saúde hodi haree ba Polítika, Estratejia, Padraun, Protokou no Modalidade Efetivu, Efisiente no Sustentável.

“Maske ita hotu akompaña no hatene katak moras HIV nu’udar moras ida-ne’ebé mai hosi ita-nia hahalok pesoál no iha risku bo’ot atu hada’et, maibé moras ida-ne’e seidauk iha ai-moruk ne’ebé bele kura definitivamente. Maske ita hotu hatene katak populasaun grupu risku maka sira-ne’ebé ativu, mane iha seksu ho mane, transjéneru no traballadór seksual sira. Maibé la taka dalan mai ita hotu, atu mós bele iha risku tanba HIV bele hada’et mós liuhusi dalan seluk hanesan tranzfusaun raan ka doasaun órgaun, injesaun no instrumentu kontaminadu, inan ba oan, instrumentu ba tatoajen no sex toys sira’’, esplika nia.

Nia dehan tempu to’o ona atu hakotu HIV, maibé tinan tolu liubá, mundiamente enfrenta surjimentu ba moras pandemia Covid-19 ne’ebé lori dezviu ba rekursu umanu, finanseiru no infraestrutura saúde atu atende urjénsia no emerjénsia ba pandemia Covid-19.

Iha oportunidade ne’e hakarak atu partilla katak dadus husi MS revela katak konsege hasa’e númeru teste HIV iha 2020 hamutuk 50.023  no iha 2022 hamutuk 50.992. Númeru akonsellamentu no referénsia aumenta. Ne’e hatudu númeru aumenta tan, nune’e mós intensifikasaun ba sensibilizasaun no mós dezentralizasaun tratamentu ne’ebé hahú ona maske sei hasoru dezafiu balun.

“Maske nune’e ita sei hasoru problema kona-ba retensaun tratamentu ne’ebé foin atinje de’it 64% tanba taxa lakon husi tratamentu no mós mate ne’ebé sei aas, inan isin rua barak ne’ebé seidauk teste HIV liuliu iha fatin sira ne’ebé dook husi fasilidade saúde sira no mós númeru ema voluntáriu halo teste ne’ebé sei menus tanba menus koñesimentu, limitasaun área kobertura, estigma no diskriminasaun no mós fatór seluk tan”, dehan nia.

Iha fatin hanesan, Representante Organizasaun Mundial Saúde iha Timor Leste, Arvind Mathur, dehan OMS, hahú  introdúz ona teste inovativu ida maka HIV Self Testing  ka auto-teste ba HIV nian, inklui apoiu tablet 35 ba MS.

“Ha’u kontente atu anunsia katak aleinde esforsu ne’ebé la’o hela bazea ba rekomendasaun husi OMS, iha TL katak ita hahú introdúz ona teste inovativu ida maka HIV Self Testing ka auto-teste ba HIV-SIDA nian. Ohin loron, ha’u mós kontente atu anunsia kona-ba introdusaun ba pre-expozisaun profilaksia ne’ebé sei demonstra ba kuaze 200 populasaun xave ne’ebé elijível, ne’e nu’udar opsaun adisionál ida ba prevensaun HIV-SIDA no nu’udar parte husi Fundasaun Konjunta Programa Nasaun Unida nian (UBRAF), ne’ebé implementa hamutuk husi UNFPA no Asosiasaun Komunidade Progressu no apoiu tékniku husi OMS”, Arvind Mathur informa.

Representante Fundu Populasaun Nasaun Unida (UNFPA), Pressia Arifin Cabo, hateten UNFPA iha kompromisiu boot hodi halo asaun prevensaun ba HIV-SIDA, tanba moras refere fó risku ba komunidade afetadu sira.

“Iha tinan 2021, UNFPA servisu hamutuk ona ho WHO no Ministériu Saúde hodi halao ezaminasaun ba prevensaun moras HIV/SIDA iha munisípiu lima iha territóriu laran tomak”, rekorda nia.

Nune’e, munisípiu ne’ebé rejistu aas liu ba kazu HIV/SIDA mak  Dili, Bobonaro, Covalima, Baucau no RAEOA.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!