DILI, 24 janeiru 2023 (TATOLI) – Komandante Jerál Polísia Nasionál Timor-Leste (PNTL), Komisáriu Faustino da Costa, hateten PNTL sempre preparadu atu asegura eleisaun parlamentár 2023.
“Ema sempre dehan PNTL prepara ka lae no pergunta ne’e dala barak ema sempre husu ba ha’u, maibé atu dehan de’it katak PNTL sempre preparadu iha kualker oras hodi fó seguransa interna ba ita nian nasaun inklui fó seguransa ba ativdade eleisaun parlamentár”, Komandante Jerál Polísia Nasionál Timor-Leste (PNTL), Komisáriu Faustino da Costa, dehan ba jornalista sira hafoin remata enkontru ho Komandante Munisípiu sira no ofisiál PNTL iha CFP, Comoro tersa ne’e.
Nia dehan Komandante Jerál konvoka enkontru ho Komandante Munisípiu sira no ofisiál sira hotu atu hahú koalia kona-ba preparasaun seguransa ba eleisaun parlamentár.
“Tanba ne’e mak ita konvoka reuniaun ne’ebé envolve hosi ita nia Komandante Munisípiu sira hotu, inklui ofisiál sira hotu atu koalia kona-ba kestaun preparasaun saida maka PNTL halo liuliu liga ba kestaun seguransa hodi fó seguransa ba ita-nian atividade kampaña no eleisaun parlamentár bele la’o di’ak”, dehan nia.
Nia dehan reuniaun sira hanesan ne’e importante atu komandu bele orienta Komandante Munisípiu no ofisiál sira bele halo servisu ne’ebé hodi fó susesu ba eleisaun parlamentár.
Kona-ba fasilidade hanesan transporte no ekipamentu sira ne’ebé atu apoia membru PNTL nia servisu, lider másimu institusaun PNTL, hateten tempu badak komandu sei distribui fasilidade no ba membru hotu.
“Tempu badak ita sei distribui karreta no fasilidade sira seluk ba membru sira atu bele utiliza ba servisu seguransa nia iha eleisaun parlamentár nian”, Komisáriu konklui.
Jornalista: Natalino Costa
Editór : Zezito Silva
