iklan

NASIONÁL, EDUKASAUN, DILI, HEADLINE

Telecomcel-Telemor instala ona liña internet maibé estudante seidauk utiliza

Telecomcel-Telemor instala ona liña internet maibé estudante seidauk utiliza

Diretór Servisu Edukasaun Munisipál Baucau Augosto Hornai Ximenes. Imajen Tatoli/Natalino Belo.

DILI, 24 janeiru 2023 (TATOLI)–Diretór Servisu Edukasaun Munisípiu Baucau (DSEMB), Augosto Ornai Ximenes, informa operadór telekomunikasaun hanesan Telkomcel no Telemor instala ona liña internet iha eskola liu 26 iha Baucau maibé to’o agora estudante sira seidauk utiliza.

Notísia Relevante: Oferese Internet Gratuita, MESSK Hein Alokasaun Orsamentu

“Ami iha Baucau kuaze iha eskola hamutuk 26-resin mak identifikadu hetan ona instalasaun liña internet maibé to’o agora ninia utilizasaun mak seidauk másimu. Espera katak anu letivu foun ba tinan ida-ne’e hahú, eskola sira-ne’e bele utiliza ona internet,” Diretór Servisu Edukasaun Munisípiu Baucau ne’e hateten ba Agência Tatoli nakait ho Fovernu liu-liu MEJD nia polítika instala internet gratuita ba eskola sira iha territóriu nasionál liuhosi telefónika, tersa ne’e.

Eskola liu 26 iha Baucau ne’ebé identifikadu hetan ona instalasaun liña internet ne’e kompostu hosi Eskola Ensinu Báziku Públiku terseiru siklu hamutuk 17 no Eskola Ensinu Sekundáriu hamutuk sia (9) maibé seidauk utiliza to’o agora.

Maibé, tuir nia, parte munisípiu Baucau halo ona konfirmasaun ho Diretór Mídia Edukativa iha nasionál hodi husu kona ba prosesu avaliasaun ba utilizasaun liña internet ne’e rasik maibé seidauk hetan resposta.

Avaliasaun ba liña internet ne’e importante tanba bele hatene ho didi’ak ema na’in hira mak asesu ona ba internet ne’e rasik, atu nune’e bele publika ba públiku katak funsionamentu internet ne’ebé instala ona ba eskola sira iha Baucau ne’e la’o ona no benefisiáriu ne’ebé rejistadu ona.

“Horisehik ha’u rasik ko’alia ona ho diretór media edukativa nian atu halo to’ok avaliasaun tanba bainhira asesu mak ita bele hatene liña ne’e di’ak ka lae no ema na’in hira mak utiliza ona. Tanba ami rasik la hatene kapasidade hosi liña internet ne’e rasik hira, entaun presiza uza mak foin bele hatene,” nia hateten.

Entretantu, Diretór Servisu Edukasaun Munisípiu Bobonaru (DSEMB), Crispim Lopez Moniz, relata totál eskola hamutuk 20 mak hetan ona instalasaun liña internet mak kompostu hosi eskola ensinu báziku terseiru siklu ba to’o iha nivél ensinu sekundáriu jerál, maibé nia seidauk bele klasifika totál númeru kada nivél.

“Ha’u hakarak dehan ita identifika ona eskola ne’ebé asesu ba eletrisidade mak hetan ona instalasaun liña internet hamutuk 20. Maibé ita seidauk hatene hosi nivel ensinu báziku hira no ensinu sekundáriu ne’e hira,” nia dehan.

Hosi munisípiu Manufahi, Diretór Servisu Edukasaun, Vitorino do Carmo, deklara katak to’o agora Ministériu Edukasaun halo ona identifikasaun ba eskola hamutuk 13 maibé prosesu instalasaun liña internet mak seidauk realiza maibé eskola hirak ne’e identifikadu asesu liña eletrisidade.

“Ami iha eskola hamutuk 13 kompostu hosi Eskola ensinu sekundáriu hitu (7) no eskola ensinu sekundária tékniku vokasionál neen (6) mak identifikadu ona, maibé to’o agora ita-nia Ministériu Edukasaun (MEJD) seidauk orienta operadór telekomunikasaun sira mai halo instalasaun,” nia hateten.

Antes ne’e, Ministru Edukasaun Juventude no Desportu (MEJD), Armindo Maia, informa tuir planu Ministériu Edukasaun nian katak molok mandatu ramata ne’e totál eskola hamutuk 206 ne’ebé iha territóriu nasionál tenke asesu hotu ona liña internet.

Tanba, tuir nia, daudaun ne’e kuaze iha ona 80% eskola sira iha territóriu nasionál mak instala ona liña internet, no fundu ne’ebé MEJD prevee hodi apoiu prosesu instalasaun internet ne’e hamutuk $800.000.

Jornalista : Tomé Amado

Editór    : Cancio Ximenes

iklan
iklan

Leave a Reply

iklan
error: Content is protected !!