Top

2022: MJ kontribui reseita hamutuk milaun $4 ba kofre Estadu

Ministru Justisa, Tiago Amaral Sarmento. Imajen Tatoli/Francisco Sony

DILI, 25 janeiru 2023 (TATOLI) – Ministru Justisa Tiago Amaral Sarmento, hateten iha 2022, konsege hatama reseita ba kofre Estadu hamutuk milaun $4 ba kofre Estadu.

“Iha fulan maiu tinan kotuk ha’u rasik hatún despaixu ba Gabinete Inspesaun Auditoria (GIA), hodi orienta GIA halo inspesaun ba rai no uma Estadu ne’ebé kompañia nasionál no kompañia internasinál iha akordu arrendamentu maibé sira la kumpre dever atu selu arrendamentu ba Estadu. Hosi serbisu sira ne’e maka ita konsege halibur reseita ba kofre Estadu hamutuk milaun $4”, Ministru Justisa Tiago Amaral Sarmento, hateten ba jornalista sira iha Palásiu Governu, kuarta ne’e.

Nia dehan husi levantamentu rai no uma Estadu ne’ebé maka MJ halo konsege identifika iha kompañia nasionál no internasionál bo’ot balun la selu arrendamentu ba Estadu no administrativamente parte GIA liuhosi Terras Propriedade haruka notifika kompañia sira ne’e selu. Iha balun ne’ebé konsege selu arrendamentu ba Estadu.

“Kuandu kompañia nasionál tantu kompañia internasionál balun maka iha akordu arrendamentu ho Estadu maka la selu arrendamentu ba Estadu ne’e ami notifika ba Ministériu Públiku hodi bele responsabilidade kriminál”, katak nia.

“Entaun ami iha dala rua hodi aplika ba kompañia sira ne’e, maka dalan adminstrativa no dalan prosesu penál”, Tiago Amaral Sarmento haktuir.

Ministru komprometidu mantein halo levantamentu ba uma no rai sira Estadu sira ne’ebé empreza nasionál no internasionál okupa maibé laiha akordu MJ sei halo averiguasaun hodi husu sira selu arrendamentu ba Estadu.

“Rai no uma Estadu ne’ebé kompañia nasionál no Internasionál iha arrendamentu ho Estadu, maibé la obedese ba lei hodi la selu arrendamentu ida ne’e mós sei kontinua halo averiguasaun hodi notifika sira selu se la selu ita halo partisipasaun ba Ministeriu Públiku”, ministru hakotu.

Jornalista : Natalino Costa

Editór : Zezito Silva

 

Publisidade

Leave a Reply

Latest Post

error: Content is protected !!