DILI, 25 janeiru 2023 (TATOLI)–Ministériu Edukasaun Juventude no Desportu liuhosi Dirasaun Jerál Edukasaun Ensinu hatún ona sirkulár hodi bandu ona eskola públiku sira iha territóriu nasionál atu labele rekruta tan profesór voluntáriu sira.
Diretór Jerál Edukasaun Ensinu (DGEE), Luis Manuel da Costa Fernandes, liuhosi karta sirkulár informativa númeru 19/DGEE-MEJD/I/2023 informa ba Diretór Edukasaun Munisipál, Superintendente no Diretór Eskola públiku sira hosi estabelesimentu ensinu báziku, ensinu sekundáriu jerál no ensinu sekundáriu tékniku vokasionál iha territóriu nasionál katak MEJD konsentra ona ba prosesu kontratasaun ba profesór voluntáriu hirak ne’ebé rejistadu ona.
Relasiona ho asuntu ida-ne’e mak Ministériu Edukasaun Juventude no Desportu liuhosi DGEE hatún ninia sirkulár ida-ne’e hodi la simu tan lista profesór voluntáriu hosi parte ne’ebé de’it. Tanba, Dirasaun Jerál Edukasaun Ensinu hakarak emite sirkulár ida-ne’e atu dirijente hotu-hotu kumpre orientasaun sira.
“Sirkular ne’ebé hasai hosi DGEE ho data 20 janeiru 2023 ne’e husu ba servisu edukasaun Munisipál sira labele fó autorizasaun hodi halo rekrutamentu ka hatama ema ba servisu hanesan profesór voluntáriu iha eskola públiku sira,” Luis Manuel da Costa Fernandes hateten ba jornalista sira, tersa ne’e.
Sirkulár ne’e mós dirije ba konsellu diretiva eskola nian labele foti desizaun hodi rekruta ka hatama ema ba servisu hanesan profesór voluntáriu iha eskola sira.
Nune’e mós, nia dehan, parseiru sira-ne’ebé maka durante ne’e fó apoiu ba Dirasaun Nasionál Ensinu Rekorrente labele halo rekrutamentu ba profesór ho programa alfabetizasaun no ekivalénsia.
Maibé ba konsellu diretiva hosi eskola ruma mak la kumpre sirkulár ne’ebé fó sai ona no kontinua hatama nafatin ema ba servisu hanesan profesór voluntária, sira mak sei responsabiliza ba ema-nia direitu tomak no mós sei hetan sansaun ba responsabilidade dixiplinár.
Enkuantu Diretór Servisu Edukasaun Munisípiu Dili (DSEMD), Carlito Soares, reforsa katak sirkulár ne’ebé fó sai hosi Dirasaun Jerál Edukasaun Ensinu Ministériu Edukasaun Juventude no Desportu katak la permite atu rekruta ka emprega tan profesór voluntáriu ba eskola sira ne’e loos duni, tanba ne’e nia mós relata katak dirijente eskola sira iha Munisípiu Dili tenke kumpre sirkulár ida-ne’e.
“Ha’u hakarak dehan sirkulár ne’e bandu ona eskola sira labele rekruta tan profesór voluntáriu sira-ne’ebé laiha, tanba razaun ida katak eskola sira mak sei responsabiliza kuandu sira rekruta tan profesór voluntáriu sira,” nia dehan.
Jornalista : Tomé Amado
Editór : Cancio Ximenes
