MNEK halo hela selesaun ba konsuladu foun TL ba Sidney
DILI, 25 janeiru 2023 (TATOLI) – Ministra Negásiu Estranjeiru no Kooperasaun (MNEK) Adaljiza Albertina Xavier Reis Magngo, halo hela selesaun ba timoroan sira ne’ebé iha abilidade di’ak bele ba okupa pozisaun hanesan konsuladu Timor-Leste nian iha Sidney Australia ne’ebé agora daudaun mamuk hela.
“Ami halo hela selesaun, maibé ami sei deside iha tempu besik, ita bele foti ema hosi liur ou laran hanesan funsionáriu sira iha MNEK ne’ebé iha koñesimentu servisu hanesan diplomata iha liur”, ministra hateten ba Agência TATOLI, iha Palasiu Governu, tersa ne’e.
Antes ne’e konsuladu Timor-Leste iha Sidney mak Luciano Valentim da Conseição maibé mandatu termina ona iha tinan kotuk.
Ho nune’e, to’o agora konsuladu refere Governu seidauk nomea ema ruma ba tur iha ne’ebá hodi halao servisu hanesan diplomata.
Tanba ne’e Ministra Adaljiza kompromete iha tempu besik Governu finaliza selesaun hafoin nomea kedan timoroan ida ba okupa kargu konsulár Timor-Leste nian iha Sidney.
Jornalista: Hortencio Sanchez
Editór : Zezito Silva
