DILI, 25 janeiru 2023 (TATOLI) – Ministra Negósiu Estranjeiru no Kooperasaun (MNEK) Adalzija Albertina Xavier Reis Magno, konvida Primeiru-Ministru Taur Matan Ruak, atu partisipa iha simeira ASEAN (Associação de Nações do Sudeste Asiático) nian iha Indonézia iha maiu.
“Ha’u koalia ho Primeiru-Ministru kona-ba prosesu ita atu tama ba observadór ASEAN nian, tanba sira konsidera ona ita hanesan membru ASEAN bele partisipa iha reuniaun hotu maibé ita seidauk iha direitu ba vota ka foti desizaun ruma, ida ne’e hatudu ita avansa ona ba prosesu ida hodi prepara aan atu sai membru loloos iha tempu balu mai tan”, ministra dehan ba Agência TATOLI iha Palásiu Governu, tersa ne’e.
Ministra afirma Timor-Leste nia ambisaun atu tama hanesan membru loloos ne’e iha 2023 nia-laran bainhira Indonézia mak asume fali knaar hanesan prezidensiál.
“Ha’u foin lalais ba Jakarta hasoru malu ho sekretariadu ASEAN nian ne’ebé foin mak simu pose iha loron hira ba kotuk no Ministériu Negósiu Estranjeiru Indonézia nian ho ema sira agora lidera prezidénsia ASEAN, ami koalia kona-ba simeira ne’ebé sei akontese iha fulan maiu ne’ebé ita nia Xefe Governu mak sei partisipa direta atu sira bele simu ita hanesan membru ba dala-11”, relata nia.
Aleinde ne’e semana oin Timor-Leste partisipa dahuluk iha reuniaun Konsellu Ministru ASEAN nian, ne’ebé Ministru Negósiu Estranjeiru nasaun 11 mak partisipa, iha reuniaun ne’e nasaun membru 10 sei simu Timor-Leste hodi fó autorizasaun partisipa iha reuniaun hotuhotu ASEAN nian.
Prosesu Timor-Leste seidauk bele tama ba membru permanente ASEAN
“Ita iha prosesu barak tenke halo tuir lejislasaun barak ita tenke adopta, konvensaun ASEAN nian barak ita tenke adopta, buat barak tan ita sei presiza tanba antes tinan 50 ASEAN iha ona, entaun akordu lubuk ida mak iha ita tenke aprova hotu akordu hirak ne’e” informa nia.
Akordu no prosesu hirak ne’ebé Timor-Leste seidauk ratifika hanesan vistu Timor-Leste tenke iha akordu ho nasaun 10 seluk atu nune’e vistu livre ba nasaun hotu, deklarasaun direitu umanu ASEAN nian hanesan free nuclear, mekanizmu ba disputa iha lista 300-resin Timor-Leste presiza ratifika.
Ho prosesu hirak ne’e hotu mak sei taka dalan ba Timor-Leste atu sai hanesan membru loloos, maibé ministra ne’e garante sei esforsu másimu atu nune’e tinan ne’e ou tinan oin Timor-Leste bele adera ona hanesan membru loloos.
Jornalista: Hortencio Sanchez
Editór : Zezito Silva
