DILI, 25 janeiru 2023 (TATOLI)–Reitór Universidade da Paz, Adolmado Amaral, hateten tinan 2023 ne’e Instituisaun Ensinu Superiór Privada Universidade da Paz (UNPAZ) loke programa doutoramentu ba administrasaun publika no siénsia de diretu iha tinan 2023 ne’e tanba nesesidade merkadu.
Programa estudu foun ne’ebé UNPAZ lansa iha tinan ne’e hamutuk kursu neen (6) mak hanesan programa doutoramentu ba administrasaun públika no siénsia de diretu, programa mestradu ba fakuldade enjeñaria indústria, fakuldade enjeñaria sivíl no fakuldade agrikultura inklui mós programa estudu lisensiatura ida iha fakuldade Farmajen ne’ebé sei tutela iha fakuldade saúde públika.
Nia dehan, kursu sira-ne’ebé UNPAZ lansa ona iha tersa (24 janeiru 2023) ne’e tanba pedidu sosiedade sira-nian, husu UNPAZ tenke iha ona programa neen (6) atu nune’e bele responde nesesidade merkadu sira iha futuru.
“Ami hato’o ona pedidu lisensa operasionál ba Ministériu Ensinu Superior Siénsia no Kultura ba programa neen (6) ne’ebé ami prepara ona, maibé kursu doutoramentu ba administrasaun públiku no siénsia de diretu mak hetan ona resposta pozitivu hosi Ministériu Edukasaun,” Adolmado Amarál hateten ba Agência Tatoli iha kampus UNPAZ, kuarta ne’e.
Tuir nia, pedidu sosiedade sira-nian hakarak loke programa sira-ne’e mak lori mós UNPAZ hodi halo mós estudu viabilidade ida inklui halo mós distribuisaun kestionáriu no halo mós entrevista ba antigu alunu sira inklui ba funsionáriu iha Ministériu sira kona ba planu UNPAZ nian atu loke programa sira-ne’e, maibé barak sujere UNPAZ hahú uluk ho programa Doutoramentu ba administrasaun públika no siénsia de Diretu.
Reitór ne’e esplika, kursu doutoramentu ne’ebé tama ona faze preparasaun no programa ne’e rasik prenxe ona rekezitu ba lisensa operasionál ne’ebé iha padraun hamutuk 11 ho indikadór 50-resin ne’e sei hetan avaliasaun hosi ministériu rasik bainhira hala’o ona ninia prosesu estudu.
Tanba, nia dehan, rekursu umanu ba dosente ne’ebé atu garante programa doutoramentu ne’e prenxe hotu ona rekizitu.
Tanba ne’e, Universidade da Paz (UNPAZ) husu ba dekanu fakuldade sira atu kontinua halo nafatin aproximasaun no kooperasaun ho parseiru UNPAZ nian iha universidade famozu sira iha nasaun Alemaña, Malázía, Indonézia no Filipina atu kontinua kumpre nafatin memorandu ne’ebé asina ona hodi bele garante katak dosente hosi nasaun sira-ne’e sei mai apoiu UNPAZ iha momentu ne’ebé de’it.
Jornalista : Tomé Amado
Editór : Cancio Ximenes
