iklan

NASIONÁL, EDUKASAUN, DILI, HEADLINE

INDMO sei apoiu formasaun profisionál ba estudante eskola TEKVOK

INDMO sei apoiu formasaun profisionál ba estudante eskola TEKVOK

Diretora Instituto Nacional Desenvolvimento Mão de Obra, Instituto Públiko (INDMO, I.P), Isabel Fernandes de Lima, selebra akordu entendementu ho reprezentante MEJD, Diretóra Jerál Planu Politika Inkluzaun, Raimundo José Neto, iha salaun Akademia Polisi Komoro, kinta (26/01/2023). Imajen Tatoli/ TATOLI.

DILI, 26 janeiru 2023 (TATOLI)–Institutu Nasional Dezenvolvimentu Mão de Obra, Institutu Públiku (INDMO, I.P) prontu ona atu fó apoiu formasaun ba jerasaun foun sira iha eskola ensinu sekundáriu tékniku vokasionál (TEKVOK) atu prepara estudante sira-ne’e bele kompete iha merkadu traballu.

Diretora Institutu Nasionál Dezenvolvimentu Mão de Obra (INDMO), Isabel Fernandes de Lima, hateten INDMO nu’udar institutu públiku ida-ne’ebé sei garante no promove kualidade formasaun mão de obra iha rai-laran, atu responde ba merkadu traballu iha nivel nasionál no internasionál.

Iha biban ida-ne’e, INDMO mós loke tan ninia kna’ar tomak hodi apoiu mós Ministériu Edukasaun Juventude no Desportu hodi realiza mós formasaun ba iha eskola ensinu sekundáriu tékniku vokasionál (TEKVOK) sira iha rai-laran.

Ministru Edukasaun Juventude no Desportu, Armindo Maia.Imajen TATOLI/Egas Cristóvão

“Ita asina ona memorandu entendimentu ida ho Ministériu Edukasaun iha loron ida-ne’e atu eleva kualidade ba eskola ensinu sekundáriu tékniku vokasionál sira iha rai-laran, atu responde ba merkadu traballu iha nasionál no internasionál iha futuru,” Diretora INDMO ne’e hateten iha serimónia asina akordu entre INDMO ho MEJD iha salaun formasaun Polisia Nasionál Koléjiu Komoro, kinta ne’e.

Nia dehan, MJED mak nu’udar departamentu governamentál ne’ebé mak responsabiliza ba konsesaun, ezekusaun, koordenasaun no avaliasaun ba polítika ne’ebé define no aprova ona hosi Konsellu Ministru, ba iha área ensinu no iha kualifikasaun nivél ensinu hotu-hotu ne’ebé mak la’ós ensinu superiór inklui mós ensinu sekundáriu tékniku vokasionál.

INDMO), I.P estabelese liuhosi Dekretu-Lei Númeru 8/2008, 5 marsu, ne’ebé altera hosi Dekretu-Lei Númeru 34/2009, 26 novembru, Dekretu-Lei Númeru 6/2017, 22 marsu, no Dekretu-Lei Númeru 54/2022, 20 jullu, nu’udar orgaun reguladora ba sistema formasaun profisionál iha Timor-Leste.

INDMO, I.P ho nia natureza reguladora mak garante, promove no eleva kualidade formasaun  mão-de-obra iha rai-laran atu bele responde ba merkadu tarballu iha nivel nasionál no internasionál.

Planu Estratejiku Desenvolvimentu Nacional (PEDN, 2011-2030) estabelese katak hasa’e kapasidade no kulidade Ensinu Sekundariu Tekeniku Vokasionál (TEKVOK) mak nu’udar komponente importante no estratéjiku ba desenvolvimentu sosiu ekonomiku Timor-leste nian.

Promosaun dalen ofisiál, juventude no desportu nu’udar hatuur nanis ona iha artigu 22 hosi Dekretu-Lei Númeru 20/2020, 28 maiu, alterasaun daualuk ba Dekretu-Lei Númeru 14/2018, 17  agostu, sobre a Orgánika do VIII Governu konstitusionál.

Hatene mós katak tuir Sistema Nacional de kualifikasaun (SNQ-TL) ne’ebé aprova hosi Dekretu-Lei Númeru 36/2011, 17 agostu konjuga ho atribuisaun INDMO, I.P nian be hatuur iha nia estatutu orgániku, INDMO, I.P mak iha kompeténsia atu atribui lisensa, akredita sentru formasaun profisionál sira inklui sertifika ba manorin sira.

Ho nune’e, INDMO, I.P no MEJD marka tan istória foun ida mak hadi’a di’ak liután kualidade integrál iha Ensinu Sekundáriu Tékniku Vokasionál (TEKVOK) iha Timor-Leste liuhosi asinatura Memorandu Entendimentu.

Akordu entre INDMO, I.P no MEJD ne’e mak atu eleva kualidade eskola TEKVOK sira nu’udar fatin ne’ebé forma mão-de-obra ne’ebé preparadu ba iha ezijénsia merkadu laborál iha nivél nasionál no internasionál, hodi énfaze liu ba kontribuisaun iha área edukasaun nian ne’ebé mak hanesan.

Viabilizasaun ba dupla sertifikasaun liuhosi estabelese kritériu no indikadór sira ba lisensiamentu no akreditasaun eskola TEKVOK sira ho rigór prosede revizaun kurríkulu eskola TEKVOK iha área produtiva sira.

Ho nune’e, tuir nia, segunda parte bele validiza ba referénsia profisionál ka konteúdu formativu ba área produtiva haktuir ba enkuadramentu jurídiku kona-ba planu kurríkulár atribui sertifikasaun formadór ba dosente sira-ne’ebé responsabiliza iha matéria espesífika ba área produtiva.

Ida-ne’e, tuir nia, nu’udar kritériu atu hetan dupla sertifikasaun no hadia di’ak liután mekanizmu realizasaun Prova de Aptidão Profissional (PAP) no métodu avaliasaun atu bele atribui dupla sertifikasaun.

INDMO, I.P no MEJD iha kompromisu atu asegura implementa Dekretu-Lei Númeru 8/2010, 15 fevereiru, ne’ebé aprova planu kurríkulár, rejime implementasaun modelu sertifikasan, organizasaun no avaliasaun ba eskola sekundária tékniku vokasionál (TEKVOK).

Ministru Edukasaun Juventude no Desportu (MEJD), Armindo Maia, hateten durante ne’e formasaun ba estudante sira iha eskola ensinu sekundáriu tékniku vokasionál ne’e la’o kle’ur tiha ona, tanba iha kooperasaun di’ak ho INDMO, I.P kona-ba sira-nia abilidade ka koñesimentu tékniku atu uza iha futuru.

Tanba ne’e, nia hateten, liuhosi asina akordu kooperasaun ida-ne’e bele kontinua loke liután espasu hodi hahú formasaun ba sira-ne’ebé hakarak uza dupla sertifikadu hosi INDMO, I.P atu uza ba servisu maibé tenke iha abilidade ka koñesimentu tékniku ida-ne’ebé adekuadu hodi bele kompete iha merkadu traballu.

“Ita hatene, ohin loron, bainhira ita ba aplika iha merkadu traballu, ema sei haree uluk ita atu hakarak hatene no ita mai hosi ne’ebé depois mak sira sei haree ita nia formasaun ne’e oinsá,” nia dehan.

Jornalista : Tomé Amado

Editór        : Cancio Ximenes

iklan
iklan

Leave a Reply

iklan
error: Content is protected !!