BAUCAU, 26 janeiru 2023 (TATOLI) – Uma-kain 54 hosi suku Tirilolo, postu administrativu Baucau Vila, munisípiu Baucau, seidauk simu subsídiu fim do ano $200.
Xefe suku Tirilolo, Ricardo Ernesto Belo, esplika, autoridade suku submete ona uma-kain 54 refere ba administrasaun Baucau nu’udar lista reklamante nune’e kontinua prosesa ba institusaun responsável hodi prosesu iha tempu besik.
“Munisípiu orienta ami submete lista reklamante maibé prosesa oinsá ona ne’e konforme ba parte kompetente sira, ami kontinua hein,” Xefe suku Tirilolo informa ba Agência TATOLI iha Vila Antiga, kinta ne’e.
Hosi totál lista refere kompostu aldeia Betulale uma-kain hamutuk 24, Lutumutu 21, Caisido rua, Osso-ua haat no Lialailesu tolu ne’ebé antes ne’e balun simu subsídiu Covid-19 no balun naran la sai nu’udar benefisiáriu.
Durante pagamentu iha uma-kain rua hosi aldeia Betulale mak deside devolve hikas osan tanba razaun saláriu liu $500.
Suku Tirilolo rasik iha tinan-2022 submete lista benefisiáriu hamutuk 2.031 ho totál orsamentu hamutuk $406.200 ne’ebé devolve hikas ba banku hamutuk rihun $10-resin tanba iha benefisiáriu balun naran iha maibé la konsege simu.
“Ita husu atu parte kompetente prosesa lalais atu benefisiáriu sira nu’udar sidadaun hosi suku,” Ricardo Belo akresenta.
Suku Tirilolo hamutuk populasaun 9.789. Hosi uma-kain hamutuk 2.031 komposta hosi aldeia neen hanesan Betulale, Lutumutu, Caisido, Osso-ua, Lialailesu no Parlamentu.
Jornalista : Natalino Belo
Editór : Evaristo Soares Martins
