DILI, 27 janeiru 2023 (TATOLI)–Diretór Eskola Eskola Ensinu Sekundáriu Jerál (ESG) 05 de Maio Becora, Adelino Nicolau Ornai, hateten iha tinan ida-ne’e ESG 05 de Maio Becora limita ona turma rua ba estudante hamutuk 453 tanba hetan ona xamada hosi Ministériu Edukasaun Juventude no Desportu (MEJD).
“Tinan rua ba kotuk ami nia eskola 05 de Maio eziste ho turma tolu. dadeer tuku 08h00 to’o 11h00 turma ida, depois hosi 11h30 to’o 14h15 turma rua no hosi fali 14h30 to’o 17h30 turma tolu, maibé agora eziste turma rua de’it ho estudante hamutuk 453,” Diretór Eskola ESG 05 de Maio, Adelino Nicolau Ornai, hateten ba Agência Tatoli iha Becora, sesta ne’e.
Maibé iha tinan ida-ne’e, nia dehan, eskola 05 de Maiu Becora hetan ona xamada atensaun hosi Ministériu Edukasaun Juventude no Desportu hodi bandu ona atu limita turma ba rua de’it, atu nune’e profesór sira bele fó importánsia ba prosesu ensinu aprendizajen iha sala-de-aula no bele kompleta kargu de oráriu ne’ebé define ona hosi Ministériu Edukasaun.
“Ita tenke fila fali ba oráriu normál tanba ita nia Ministériu Edukasaun mai trava ona turma tolu ne’ebé ita estabelese iha eskola 05 de Maio. Ita-nia Ministériu hakarak profesór no alunu sira bele foku ba matéria sira-ne’ebé mak hala’o iha aula tanba ne’e agora iha de’it atividade dadeer no lorikraik ba estudante sira,” nia hateten.
Atividade prosesu ensinu aprendizajen iha eskola ne’e, agora eziste dadeer ho lorokraik de’it ba estudante hamutuk 453 ne’e, hahú hosi désimu anu nian kada sala aula iha ona koloka estudante entre 45 to’o 56 de’it.
Maibé ba estudante désimu primeiru anu no désimu segundu anu mak sei eziste nafatin ho estudante hamutuk 60 ba leten no ida-ne’e mós tanba númeru estudante tinan kotuk nian.
Entretantu, agora ne’e bele ona kontrola tanba despaixu Ministerial fó sai ona iha tinan kotuk katak labele simu tan estudante hosi munisipiu sira, tanba ne’e mak eskola mós bele kontrola estudante sira depois prosesu ensinu aprendizajen ba estudante sira iha sala-de-aula mós hetan rezultadu di’ak liuhosi identifikasaun mellór klasifikadu ba estudante na’in-ualu (8) iha ESG 05 de Maio ne’e.
Jornalista : Tomé Amado
Editór : Cancio Ximenes
