MEJD rekonverte eskola TEKVOK ba ESG fó vantajen ba estudante sira
DILI, 27 janeiru 2023 (TATOLI)–Eskola Ensinu Sekundáriu Tékniku Vokasionál (ESTV) Bobonaro ne’ebé rekonverte ona ba ensinu sekundáriu jerál (ESG) lori vantajen boot ba estudante sira tanba eskola ne’e simu ona estudante 100-resin.
“Uluk eskola TEKVOK Bobonaro ne’e sei eziste iha de’it estudante la to’o na’in 20 maibé depois sira rasik hosi ita rekonverte fali eskola ne’e ba ensinu sekundáriu jerál (ESG), agora kuaze estudante liu 100 mak tama ona iha ne’e,” Ministru Edukasaun Juventude no Desportu, Armindo Maia hateten ba Agência Tatoli iha nia kna’ar fatin Vila Verde, foin lalais ne’e.
Governante ne’e haktuir eskola TEKVOK Bobonaro inklui eskola TEKVOK tolu iha Ermera no mós eskola TEKVOK ida iha Dili no fatin sira seluk, ne’ebé Ministériu Edukasaun rekonverte ba fali Eskola ESG ne’e tanba liu hosi prosesu avaliasaun ida-ne’ebé rigorozu realmente eskola sira ne’e la prenxe rekizitu ne’ebé MEJD deside ona ba eskola TEKVOK sira.
“Ita-nia eskola ensinu sekundáriu tékniku vokasionál lubuk ida depois ita halo avaliasaun la konsege prenxe rekizitu. Iha balun ita fó tempu atu kompleta rekizitu sira maibé balun fali ita husu atu fila-fali ba ensinu sekundáriu jerál tanba labele duni,” nia dehan.
Tuir nia, eskola TEKVOK lubuk ida la prenxe rekezitu ne’e, MEJD haree hosi buat lubuk ida mak hanesan laiha infraestrutura maibé uza fali fasilidade eskola edukasaun Pre-Eskolár ka ensinu báziku ninian, laiha ekipamentu, profesór sira laiha kualifikasaun sufisiente liu-liu ba área produtiva.
Haree laiha ekipamentu no fasilidade sufisiente ne’e mak Ministériu Edukasaun foti desizaun hodi transforma fila-fali ba eskola ensinu sekundáriu jerál.
Nia dehan, eskola TEKVOK sira-ne’e la taka tanba la prenxe rekizitu entaun tenke rekonverte ba fali ensinu sekundáriu jerál.
MEJD ninia foku ne’e ba estudante la’ós ba profesór sira tanba iha eskola TEKVOK balun kuaze númeru profesór ho estudante hanesan de’it tanba ne’e mak presiza haree hodi hadi’a, entaun tenke konsidera katak afinál demanda hosi komunidade hakarak rekonverte eskola TEKVOK sira ne’e iha duni balansu.
Jornalista : Tomé Amado
Editór : Cancio Ximenes
