DILI, 29 janeiru 2023 (TATOLI)–Profesór hamutuk na’in-174 iha eskola Ensinu Sekundáriu Tékniku Vokasionál (TEKVOK) iha Timor-Leste (TL) sei partisipa iha formasaun profisionál mão de obra ne’ebé hetan ona akordu entre Ministériu Edukasaun Juventude no Desportu (MEJD) ho Instituisaun Nasional Dezenvolvimentu Mão de Obra (INDMO).
Diretór Nasionál Ensinu Sekundáriu Tékniku Vokasionál (DNESTV), Augusto Pereira, hateten eskola TEKVOK sira agora hetan ona oportunidade di’ak tanba Ministériu Edukasaun hamutuk ho INDMO asina ona memorandu entendimentu atu apoiu formasaun profisionál mão de obra ba profesór no estudante sira.
“Ita sei fó uluk oportunidade ba profesór hamutuk 174 atu hetan uluk formasaun iha INDMO hodi hasa’e uluk sira-nia koñesimentu, sira-nia kualidade no abilidade profisionál depois mak sei abranje mós ba estudante sira, depois mak ita sei fó tan ba sira seluk,” Diretór Nasionál Ensinu Sekundáriu Tékniku Vokasionál ne’e hateten ba Agência Tatoli liuhosi telefónika, segunda ne’e.
Nia dehan, estudante sira atu hetan kualidade di’ak, mestre ka profesór sira mak tenke prepara an uluk atu sira bele fahe matenek ne’e ba fali estudante sira maibé kuandu sira la prepara an ho di’ak oinsá mak estudante sira bele iha kapasidade atu kompete iha merkadu traballu, tanba ne’e dirasaun presiza hasa’e abilidade ida adekuadu ba profesór sira molok hatutan ba estdunate sira
Ho nune’e, liuhosi polítika VIII Governu Konstitusionál nian hakarak garante kualidade edukasaun ba jerasaun foun sira atu iha futuru bele kompete iha merkadu traballu, mak tenke iha duni formasaun ida-ne’ebé adekuadu hanesan formasaun ida-ne’ebé INDMO sei oferese ba profesór no alunu sira iha tempu oin mai, tanba formasaun ida-ne’e mak atu termina kualidade edukasaun iha eskola TEKVOK ba futuru.
Ministru Edukasaun Juventude no Desportu (MEJD), Armindo Maia, hateten objetivu prinsipál hosi akordu ne’ebé realiza ona entre MEJD ho INDMO ne’e atu mellora sistema edukasaun liu-liu iha Ensinu Tékniku Vokasionál sira iha Timor-Leste, tanba edukasaun mak xave ba dezenvolvimentu sosiál no mós dezenvolvimentu ba nasaun ida-ne’e nian.
Kompeténsia Ministériu Edukasaun Juventude no Desportu nian hakarak atu jere no hadi’a kualidade edukasaun ida sustentavel hodi hamosu rekursu umanu kualifikadu iha área oioin tuir nesesidade nasaun nian, no tuir kualidade edukasaun ne’ebé bele hatán ba merkadu traballu no mós atu kontribui hodi hamenus dezempregu iha nasaun ne’e.
Ministériu Edukasaun halo esforsu ida-ne’e atu hadi’a no reforsa kondisaun iha eskola TEKVOK sira atu estudante sira bele hetan asesu ba koñesimentu sientífiku umanizmu no mós tékniku.
Aleind ene’e, alunu sira bele apreende pratika no koñesimentu iha setór produtivu hodi prepara-an tama ba merkadu traballu ka hakarak kontinua estudu ba ensinu superior, universidade ka politekniku.
Jornalista : Tomé Amado
Editór : Cancio Ximenes
