Empreza rua hetan kontratu hosi BTL,E.P hodi fornese bee-moos ba komunidade
DILI, 30 janeiru 2023 (TATOLI)— Kompañia rua, Mamatelu Tuniva Unipessoal Lda, no CDFG Unipessoal, Lda, segunda ne’e asina kontratu ho Bee Timor-Leste, Empreza Públika (BTL,E.P) atu fornese bee-moos ba komunidade munisípiu Covalima no Viqueque.
Iha asina kontratu ne’e, kompañia Mamatelu Tuniva Unipessoal Lda, sei halo projetu konstrusaun fornesimentu sistema bee-moos ba postu administrativu Zumalai, munisípiu Covalima.
Nune’e kompañia CDFG Unipessoal, Lda, sei halo projetu konstrusaun fornesimentu bee-moos ba postu administrativu Ossu, munisípiu Viqueque.
“Ohin ita asina akordu ho ita-nia kompañia rua, oinsá apoiu ita hodi fornese bee-moos ba ita-nia komunidade, projetu ne’e rasik sei implementa durante fulan neen,” Prezidente BTL,E.P, Carlos Peloi dos Reis, hateten iha Caicoli, Dili, segunda ne’e.
Nia dehan, kompañia rua ne’ebé ohin asina kontratu ho BTL,E.P ne’e ba kompañia, Mamatelu Tuniva Unipessoal Lda, ho nia orsamentu hamutuk $419.349,04 no CDFG Unipessoal, Lda, hamutuk $421.903,57.
“Hosi munisípiu rua ne’e komunidade ne’ebé sei asesu ba bee-moos mak iha Zumalai hamutuk uma-kain 630 ho totál populasaun 3.780, nune’e ba Ossu uma-kain 475 ho totál populasaun hamutuk 2.850,” nia dehan.
Iha fatin, hanesan, Diretór ba kompañia Mamatelu Tuniva, Unispessoal, Lda, Osvaldo Tavares, hateten, sira-nia parte sei servisu makaas tuir kontratu durante fulan neen.
“Bainhira ami implementa projetu sei servisu hamutuk ho autoridade lokál no komunidade nune’e ita-nia komunidade bele lalais asesu bee-moos, tuir kontratu projetu ita fornese sistema bee-moos ba komunidade halo instalasaun metru rua, no hosi bee matan dada be ba tanke rezervatóriu iha kolómentru 600,” nia hateten.
Nune’e, Administradór Ossu, munisípiu Viqueuqe, Sebastião Ferreira Pires, hateten, nia parte nu’udar autoridade lokal agradese ba BTL,E.P tanba bele fó ona oportunidade ba kompañia hodi bele fornese bee-moos ba nia komunidade.
“Iha projetu ne’e, ha’u-nia komunidade koopera tebes ho kompañia sei servisu hamutuk hodi nune’e ita bele hetan bee-moos, tanba iha Ossu ne’e komunidade barak mak seidauk asesu ba bee-moos, maibé ho projetu ne’e ha’u fiar ba oin ha’u-nia komunidade sei hetan hotu bee-moos,” nia hateten.
Jornalista : Arminda Fonseca
Editora : Armandina Moniz
