MEJD husu UNICEF-Plan International apoiu eskola afetadu dezastre naturál
DILI, 30 janeiru 2023 (TATOLI)–Ministru Edukasaun Juventude no Desportu (MEJD), Armindo Maia, konsidera orsamentu atu apoiu kalamidade dezastre naturál ba eskola 20 iha munisípiu hitu seidauk iha.
Tanba ne’e, nia hateten, MEJD husu apoiu parseiru dezenvolvimentu rua hanesan UNICEF no Plan Internasionál atu ajuda hela materiál emerjénsia ba eskola refere.
“Presiza hatene katak ita-nia orsamentu janeiru nian to’o agora seidauk la’o, tanba ne’e ita-nia armajen sira mós sei mamuk hela seidauk iha materiál emerjénsia ruma, ita atu uza hodi apoiu ita nia eskola 20 ne’ebé afetadu dezastre natural iha janeiru 2023 ne’e,” Ministru Armindo Maia hateten ba jornalista sira iha Timor Plaza, segunda ne’e.
Tanba MEJD ninia orsamentu seidauk iha atu sosa materiál emerjénsia sira hodi apoiu eskola 20 iha Munisípiu Aileu, Ainaro, Bobonaro, Viqueque, Covalima, Ermera no Lospalos ne’e mak MEJD husu apoiu liuhosi parseiru dezenvolvimentu hanesan UNICEF no Plan Internasionál atu kontinua ajuda hodi tulun material ba eskola sira-ne’e.
Ministériu Edukasaun ho parseiru dezenvolvimentu Internasionál sira kontinua iha kooperasaun di’ak, liuhosi eventu abertura ba kolókiu validasaun ba opsaun polítika jestaun dezastre naturá relasiona ho Edukasaun nian ne’e sempre hetan rezultadu ne’ebé di’ak.
Kolókiu ida-ne’e importante duni atu tulun Governu liu-liu Ministériu Edukasaun atu prevee orsamentu ba situasaun dezastre naturál sira-ne’ebé sempre akontese iha Timor-Leste kada tinan.
“Ita nunka prevee katak dezastre naturál ne’e bele akontese iha tempu ne’ebé de’it. ita bele haree iha 4 abríl 2021, ita hetan dezastre naturál ne’ebé sériu tebes ne’ebé ho ninia impaktu destroisaun kuaze millaun $400,” nia hateten.
Iha tinan 2022 entre fulan-dezembru mai to’o janeiru akontese tan dezastre naturál anin no udan boot kuaze eskola hamutuk 20-resin mak hetan estraga ne’ebé agora presiza atende.
Ne’e duni, Ministériu Edukasaun tenke prevee ona orsamentu ba kalamidade ka dezastre naturál ne’e labele ona hanesan orsamentu normál de’it, maibé tenke halo ona ezersísiu ida ho sériu atu bele responde ho lalais kuandu eskola sira afeta dezastre naturál.
Entretantu reprezentante UNICEF iha Timor Leste, Bilal Aurang Zeb Durrani, hateten Timor-Leste nu’udar nasaun ida-ne’ebé fasil tebes akontese ka afeta dezastre naturál ne’ebé dala barak liu sempre akontese ka afeta ba eskola sira iha territóriu nasionál ne’ebé lokaliza iha area risku.
Tanba ne’e, nia sujere ba Ministériu Edukasaun atu halo ona preparasaun ida di’ak hosi tulun eskola sira bele prepara hodi responde ba situasaun emerjénsia sira-ne’e.
Jornalista : Tomé Amado
Editór : Cancio Ximenes
