DNMG alerta semana ne’e sei akontese udan ba munisípiu hotu
DILI, 31 janeiru 2023 (TATOLI)— Ministériu Transporte no Komunikasaun (MTK) liuhosi Diresaun Nasional Meteorolójia no Jeofízika (DNMG) fó sai previzaun tempu hatudu katak semana ne’e hahú loron 31 to’o 05 fevereiru sei akontese udan intensidade fraku ho forte ba munisípiu hotu.
Bazeia ba nota komunikadu ne’ebé Agência Tatoli asesu tersa ne’e, hatudu durante semana ne’e liuliu iha loron 05 fevereiru munisipíu ne’ebé sei akontese udan ho intensidade forte liu mak hanesan, Ainaro, Aileu Manufahi, Covalima, Ermera, Liquiça, Manatuto Bobonaro inklui Rejiaun Administrativa Espesiál Oé-cusse Ambeno (RAEOA).
Ba munisípiu sira seluk hahú ohin to’o 04 fevereiru sei akontese udan maibé hahú hosi intensidade fraku naton no forte. Maibe, bá munisípiu rua Ermera no Manufahi mak sei akontese udan ho intensidade forte liu.
Hosi previzaun tempu ne’e DNMG observa katak instabilidade atmosférika kontinua favorece udan ho intensidade fraku-forte liu kuaze iha territóriu Timor laran liuliu iha parte foho sira entre loron 31 janeiru too 05 fevereiru 2023 preferensialmente parte lokraik to’o inisiu kalan.
Velocidade anin sei varia hosi normal to’o maka’as (10-38 km/h) akompaña ho rajadas (anin boot) ho nia intensidade boot liu 40 km/h iha rejiaun kosteira ka tasi ibun sira entre loron 01 fevereiru 2023. Intensifikasaun anin refere sei influénsia mós tasi a’as.
Poténsia ba udan ho intensidade (fraku to’o forte liu) durante semana ne’e nia laran sei fo risku dezastre idrometeorológiku hanesan be’e sa’e, rai halai ka monu, deskarga eletrika no seluk tan principalmente iha rejiaun foho sira.
Nune’e DNMG alerta ba komunidade bainhira akontese udan no anin bo’ot husu ba populasaun sira hadook aan nafatin hosi fatin risku sira no buka hela iha fatin ne’ebé seguru.
Kazu emerjénsia ruma ka karik presiza halo evakuasaun, matein kalma nafatin, evita pániku no halo tuir orientasaun autoridade lokál ka pesoál protesaun sivíl ne’ebé besik.
Jornalista : Arminda Fonseca
Editora : Armandina Moniz
