g7+ lansa livru ‘’Fragile States in an Unequal World’’
DILI, 31 janeiru 2023 (TATOLI) – Organizasaun mundiál g7+ halo lansamentu ba livru ho tópiku Fragile States in an Unequal World ho objetivu atu sai hanesan referénsia ba estudante timoroan sira ne’ebé estuda kona-ba diplomasia.
“Livru ida ne’e internasionalmente ita lansa tiha ona iha Inglaterra, ohin ita lansa ne’e doméstika ba ita-nia estudante sira, ba ita-nia diplomata no serbisu relasaun internasionál sira hanesan referénsia ida, katak atu harii organizasaun internasionál la’ós fasil, tenke servisu makas, halo sakrifisiu, tenke liuhosi advokasia, diplomasia no fatór barak foin bele foti rezultadu, buat hotu koalia iha livru ne’e nia laran”, Sekretáriu Jerál g7+ Helder da Costa, dehan ba Agência TATOLI iha edifisiu Ministeriu Finansas (MF) Aitarak Laran, ohin.
Nia esplika katak livru ne’e koalia kona-ba rezultadu servisu durante tinan 12 ezisténsia g7+ nian, liuhosi livru ne’e, atu husik hela ba jerasaun foun sira bele hatene kona-ba servisu hotu g7+ nian.
“Ida ne’e hanesan referénsia ida bainhira jerasaun foun sira hola parte iha g7+ bele haree livru ne’e sai hanesan lisaun hodi aprende, tanba organizasaun ne’e ita harii iha tinan 13 ona, buat barak mak ita halo iha nível globál hanesan luta ba halo advokasia ba páz entre nasaun sira hotu no seluktan, livru ne’e públikadu no bele sai referénsia ba foinsa’e sira”, nia fo hanoin.
Livru ne’e hakerek hosi Brazileira ida hanesan profesora iha Universidade Katólika Pontifika Rio de Janeiro ho naran Isabel Rocha de Siqueira, livru ne’e nia pajina hamutuk 233 kapítulu ualu no livru ne’e nia prefásiu hakerek hosi lider Karismátiku Kay Rala Xanana Gusmão ne’ebé sujere livru ne’e vale ba diplomata, estudante relasaun internasionál no jornalista hotu atu aprende kona-ba servisu sira iha nasaun frajíl nian. Livru refere hakerek durante tinan tolu no publika iha tinan kotuk 2022.
Partisipa iha lansamentu livru ne’e mak Vise-Ministru Finansas António Freitas, Pe. Juvito do Rego, akademista sira no estudante hosi Universidade públiku no privadu sira.
Jornalista: Hortencio Sanchez
Editór : Zezito Silva
