Governu harii sentru formasaun téknika profisionál ba joven sira iha Metinaro
DILI, 31 janeiru 2023 (TATOLI)–Primeiru-Ministru (PM), Taur Matan Ruak, deklara iha inaugurasaun eskola ensinu sekundáriu tékniku vokasionál (ESTV) Maria Regina Guterres, sigbifika VIII Governu Konstitusionál harii sentru formasaun tékniku profisionál ida ba joven sira iha Metinaru, nune’e bele forma joven rihun 10 kada tinan.
“Ha’u hakarak hateten VIII Governu Konstitusionál iha inisiativa ida atu realiza iha mota sorin ne’ebá atu harii sentru de exelénsia ka sentru formasaun tékniku profisionál ida ba ita-nia joven sira. Tanba ita haree durante tinan 20 nia laran formasaun ba ita-nia joven sira mukit tebes, enkuantu kada tinan númeru ba joven sira sempre aumenta ba beibeik,” PM Taur hateten iha diskursu ba serimónia inaugurasaun ba eskola TEKVOK iha Wenunuk, Metinaro, tersa ne’e.
Xefe governu ne’e hateten, VIII Governu Konstitusionál prepara ona fatin ida-ne’e ba faze dahuluk atu tau sentru formasaun iha Becora no sentru formasaun ihai Tibar atu hamutuk iha ne’e, atu área Metinaru ne’e bele iha sentru ida-ne’ebé exelente duni ba joven sira atu hasa’e sira-nia abilidade depois mak sei halo espansaun ba iha faze daruak.
“Ita-nia previzaun kuandu bainhira sentru exelénsia ne’e mak instala ona iha Metinaro, kada tinan ita sei bele forma ema hamutuk rihun 10 iha fatin ida-ne’e. Tanba ne’e prosesu espansaun no okupasaun ba zona ne’e tenke ativu no dinámiku liután ho atividade sira iha tempu oin mai,” nia hateten.
Tanba, nia dehan, agora daudaun iha Dili ne’e VIII Governu halo ona preparasaun ba mestre planu ba ordenamentu sidade Dili, maibé iha Metinaru sei sai fatin espansaun hosi Dili mai iha parte Leste ne’e. Purtantu bainhira iha ona planu rekualifikasaun sidade Dili, Parlamentu Nasionál mós sei muda sai hosi Dili, Universidade Estatál sira sei ba hotu Aileu, enkuantu portu Dili muda ona ba Tibar.
Ho nune’e, neineik-neineik sei iha kondisaun ida di’ak liu hodi halo habitasaun fatin ka uma ba família rihun rua sira atu hela iha Metinaro no Tasi-Tolu, atu iha ba futuru sidade Dili bele sai fatin ida furak la’ós ida hanesan agora ne’e, kuaze iha mota ibun no rai-lolon sira ema okupa hotu halo sidade Dili nia oin ne’e sai estraga hotu.
Jornalista : Tomé Amado
Editór : Cancio Ximenes
