DILI, 31 janieru 2023 (TATOLI)—Xefe suku Leorema, postu administrativu Bazartete, munisípiu Liquiça, Sandra de Araujo, hateten to’o agora Governu liuhosi ekipa pagamentu ba subsídiu $200 hosi MSSI seidauk selu xefe família na’in-rua hosi Leorema ne’ebé kastigu iha prizaun Gleno.
Notísia Relevante: Governu halo ona pagamentu subsídiu $200 ba uma kain 295.300
“Ha’u-nia komunidade iha xefe família rua ne’ebé kastigu iha prizaun Gleno ne’e, ekipa pagamentu sira la konsege halo pagamentu. Sira dehan sira mak atu ba selu iha prizaun maibé ikus ami rona informasaun hosi família katak sira la konsege selu ema na’in-rua ne’e tanba portaun komarka Gleno taka,” Xefe suku Leorema hateten ba Agência Tatoli liuhosi telefónika, tersa ne’e.
Xefe suku preokupa tebes tanba ninia xefe família rua labele hetan direitu mesmu iha prizaun maibé sira nafatin iha direitu ba programa Governu nian liga ho ema-nia nesesidade loron-loron nian.
“Kuandu seidauk selu ne’e informa mai ami para ami bele relata iha lista reklamante nian, nune’e bele prosesa karik iha posiblidade hetan direitu ne’e. Tanba, iha ne’e ami hatama ona lista reklamente ba parte kompetente, nune’e ita hanesan preokupa ba ita-nia família rua ne’e,” nia dehan.
Nia haktuir, família rua ne’e oan sei kiik no seidauk iha kartaun eleitorál no família ida feen ho laen tama kadeia kazu konflitu Leorema nian, no seluk fali ferik-oan labele simu tanba feen laiha ona katak sira fahe malu ona.
“Entaun ita laiha dalan ne’ebé mak bele selu família rua ne’e, tanba ne’e husu ajuda ba mídia TATOLI atu informa hela, nune’e parte kompetente tau konsiderasaun hodi bele aumenta ba lista reklamante nian tanba reklamasaun Leorema nian ami entrega tiha ona,” nia hateten.
Suku Leorema iha aldeia sanulu (10) hanesan Baura, Bucumera, Cutulau, Ergoa, Fatunero, Hatu-Hou, Manu-Lete, Railuli, Urema, Urluli ho xefe família iha Leorema hamutuk 1.895.
Notísia Relevante: Pagamentu subsídiu $200, RAEOA devolve hikas rihun $364-resin
Jornalista : Osória Marques
Editór : Cancio Ximenes
