Majór Jenerál Christoper Callahan fó palestra ba IDN
DILI, 31 janeiru 2023 (TATOLI) – Majór Jenerál Christoper Callahan hanesan komandante guarda nasionál estadu Rhode Island Estadus Unidus Amerika (EUA) fó palestra ida ba Institutu Defeza Nasionál (IDN), toka kona-ba parseiru servisu entre Rhode Island ho Timor-Leste iha área oioin liuliu defeza seguransa no protesaun sivíl.
“Ohin Majór Jenerál Christoper Callahan hanesan komandante guarda nasionál estadu Rhode Island EUA hala’o palestra ida ho ita atu koalia kona-ba área saida de’it atu ita bele servisu hamutuk, iha área formasaun, treinamentu militár”, Klamar Fuik dehan ba Agência TATOLI iha edifísiu Palasiu Governu, ohin.
Programa ne’e hanesan meiu ida hodi hametin liután lasu amizade entre Timor-Leste no EUA hodi tulun malu iha área seguransa nian atu bele dudu dezenvolvimentu nasaun nian.
Iha oportunidade ne’e Majór Jenerál Christoper Callahan iha nia palestra informa katak hakarak apoiu barak liu Timor-Leste kona-ba dezastre naturál.
“Ita iha relasaun ne’ebé di’ak, ita iha akordu oioin iha área militar no seluk tan, maibé ami hakarak atu apoiu barak liu kona-ba dezastre naturál nian, hanesan dezastre ne’ebé mosu iha Timor-Leste 04 abril 2021 laiha estrutura atu apoiu dezastre ne’e, entaun ba oin ami hakarak apoiu liu dezstre naturál bainhira akontese, ami nia militár sira destaka iha illa sira besik Timor-Leste liuliu iha tasi pasífiku nian bele tulu Timor-Leste bainhira mosu dezastre naturál saida de’it ami sei apoiu”, dehan Majór Jenerál ne’e.
Palestra ne’e partisipa hosi membru Parlamentu Nasionál balun, Vise Xefe Estadu Maiór das Forsas Armada Majór Jenerál Calisto dos Santos “Coliati”, membru Polísia Nasionál Timor-Leste (PNTL), membru FALINTIL-Forsa Defeza Timor – Leste (F-FDTL) no estudante hosi Universidade públiku no privadu balu iha Dili laran.
Jornalista: Hortencio Sanchez
Editór : Zezito Silva
