Markasaun fronteira TL-Indonézia sobu hosi mota sei hadia iha tempu badak
DILI, 01 fevereiru 2023 (TATOLI) – Vise Ministru Negósiu Estranjeiru no Kooperasaun (MNEK) Julião da Silva, informa markasaun fronteira entre Timor-Leste no Indonézia ne’ebé hetan estragu iha tinan rua kotuk tanba kauza hosi dezastre naturál identifika ona no sei hadia iha tempu badak.
“Horikalan ha’u simu informasaun hosi ita nia Komandante Unidade Patrollamentu Fronteira (UPF) balun katak mota estraga markasaun baliza ita ho Indonézia iha tinan rua ba kotuk to’o agora seidauk hadia no ita sei tau importánsia hodi hadia iha tempu besik”, Julião dehan iha Palásiu Governu, ohin.
Nia dehan, estragu ne’e ladún iha impaktu negativu ba nasaun rua tanba tuir akordu entre nasaun rua ne’ebé durante ne’e utiliza GPS iha liña fronteira entre rai rua.
“Markasaun sira ne’e mota atu sobu tiha mais laiha problema bo’ot tanba ita utiliza hela GPS bele identifika fali baliza loloos ne’e, maibé ita prevé ona orsamentu atu bele hadia, Timor-Leste mesak mak hadia laiha buat ida tanba ne’e kustu ladún boot”, salienta nia.
Tuir dadus ne’ebé MNEK rekolla iha teritóriu nasionál hotu katak markasaun ne’ebé hetan estragu ida de’it mak Mota-ain. Nune’e Governu sei tau orsamentu hamutuk rihun $10 hosi Orsamentu Jeral Estadu (OJE) tinan 2023 hodi hadia fila fali.
“Maioria markasaun iha fronteira entre ita ho Indonézia ne’e di’ak hotu hela, so ida de’it mak mota sobu, mas laiha problema, ita sei hadia tinan ne’e nia laran”, hakotu nia.
Jornalista: Hortencio Sanchez
Editór : Zezito Silva
