Top

Uma-kain hitu iha Becuse-Kraik ne’ebé la kumpre desizaun Tribunál ne’e krime

Juiz Administradór Tribunal Distritál Dili (TDD), Afonso Carmona. Imajen/Dok. Tatoli

DÌLI, 31 janeiru  2023 (TATOLI) – Juíz Administradór Tribunál Distritál Dili, Afonso Carmona, dehan família uma-kain hitu ne’ebé mak hetan eviksaun tenke kumpre desizaun Tribunál, se la kumpre, ne’e krime.

 “Kestaun eviksaun ba família uma-kain hitu seidauk hotu no sei kontinua. Sé de’it maka tribunál husu tenke kumpre, se la koopera, ida ne’e dezobidénsia ba orden tribunál, ne’e krime”, juíz dehan ba jornalista sira iha TDD, ohin.

Nia akresenta katak iha faze eviksaun daruak ida ne’e Tribunál sei husu ba família uma-kain hitu tenke kumpre desizaun ne’ebé maka Tribunál hasai ona.

Afonso hato’o posizaun ne’e relasiona ho mandadu sitasaun ne’ebé maka TDD hasai iha segunda (30/1) haruka ba família uma-kain hitu iha Becuse Kraik, Suku Becora, atu hamamuk sira nia uma.

“Horseik ami nia ekipa sira ba halo eviksaun (ezekusaun) ba uma-kain hitu iha área Becuse nian, maibé sira la konsege tanba razaun balun, ita bo’ot sira hatene katak buat ida eviksaun ne’e ita labele halo iha loron ida maibé ita sei kontinua halo eviksaun ne’e iha faze tuir mai”, dehan Juiz.

Afonso esplika katak kazu rai iha Becuse ne’e bolu dehan prosesu deklarativu, ne’ebé maka aprezenta hosi parte rua, ida kontraditóriu no ida seluk aprezenta faktus mai Tribunál  kona-ba rai ne’ebé família hitu okupa no Tribunál haree ba kestaun ne’e.

Momentu ne’e, Tribunál fó tempu ba parte kontraditóriu iha loron 20 atu pronúnsia buat ruma ba kazu ne’e. Maibé parte kontraditóriu la halo ida ne’e durante loron 20 nia-laran, ikus liu mak Tribunál foti desizaun no parte kontaditóriu tenke lakon.

Nia hateten katak ba kazu sira hanesan ne’e, Tribunál la’os naran ba halo eviksaun arbiru enkuantu kazu ne’e sei iha hela prosesu laran, Tribunál halo eviksaun tanba prosesu ba kazu sivil ne’e hotu ka loos hotu ona.

Tanba ne’e, Tribunál halo desizaun ikus hodi ba halo evikasaun, buat sira ne’e seidauk iha nia finalidade karik Tribunál seidauk bele ba halo eviksaun.

“Desizaun ne’ebé Tribunál halo ne’e, nudar desizaun ikus ba kazu ne’e, tanba ne’e Tribunál deside atu halo eviksaun ba uma ne’e no eviksaun ne’e parte ida atu konfirma iha akta ne’ebé sei junta iha prosesu ba kazu ne’e, hodi nune’e ofisiál justisa sei entrega ba Juiz ne’ebé Titulár ba kazu ne’e, hodi haree, karik nia atu arkiva ka oinsá depende ba Juiz Titulár ne’ebé kaer kazu ne’e”, dehan juiz.

“Tribunál ne’e ita defende ema nia umanidade la’os halo desizaun arbiru de’it”, revela nia.

Hatan kona-ba prezensa Xanana Gusmão nian,  Juiz dehan katak ne’e  fó motivasaun ba servisu Tribunál nian.

“Se maka mosu iha ne’ebá Tribunál konsidera di’ak hela no normál. Tanba ne’e atu ajuda Tribunál hodi públika katak Tribunál ema presiza hatene, Tribunál fó obrigadu ba maun bo’ot Xanana, tanba bele preokupa servisu Tribunál nian hodi koalia ba públiku atu bele hatene situsaun sira ne’e. Tanba situasaun sira ne’e, dala ruma mosu derepente iha terenu halo ema hakfodak ba desizaun Tribunál nian”, konklui nia.

Notísia relevante : Mari Alkatiri husu Governu rezolve problema uma kain-hitu iha Becuse

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!