Almirante EUA hasoru malu ho Primeiru-Ministru Taur

DILI, 02 Fevereiru 2023(TATOLI) – Almirante John C. Aquilino, Komandante Komandu Indo-Pasífiku Estadus Unidus Amerika (EUA) hasoru malu ho Primeiru-Ministru Taur Matan Ruak, koalia kona-ba fortalese kooperasaun iha setór seguransa.

“Estadus Unidus Amérika mantein kooperasaun iha área seguransa. Ita hamutuk hala’o ezersísiu militár konjuntu, promove ba oin kona-ba dezenvolvimentu formasaun profisionál sira no reforsa asisténsia umanitária”, Almirante dehan liuhosi komunikadu ne’ebé Agência TATOLI asesu, ohin.

Nia hateten katak kooperasaun ne’e haklaen tanba bazea ba valór demokrátiku no interese ema hotu nian iha rejiaun Indo-Pasífiku ida ne’ebé nakloke, livre, dame no prósperu liután.

Aquilino nia vizita iha Timor-Leste, aleinde diskute kona-ba asuntu seguransa, sei partisipa mós iha asinatura ba programa parseria estaduál, inagura infraestrutura saúde foun, anunsia apoiu foun ba F-FDTL nian no reabilitasaun konjunta aeroportu Baucau.

Aquilino mós sei hamutuk ho Xefe Estadu Maiór Jenerál, Tenente Jenerál Falur Rate Laek no Ministru Defeza (MD) Filomeno Paixão, hodi komemora esforsu Timor-Leste nian hodi harii instituisaun demokrátika sira durante serimónia loron transformasaun Falintil ba Falintil-Forsa Defeza Timor-Leste (F-FDTL).

Jornalista: Hortencio Sanchez

Editór : Zezito Silva