Don Virgílio : Hosi eroi sira-nia mate FALINTIL tranforma ba F-FDTL
DILI, 02 fevereiru (TATOLI)— Arsebispu Arkidioseze Metropolitana Dili, Don Virgílio Kardeál do Carmo da Silva, hato’o parabens ba Inistituisaun FALINTIL Forsa Defeza Timor-Leste (F-FDTL) ne’ebé ohin halo aniversáriu ba dala-22 hosi transformasaun FALINTIL ba F-FDTL.
Nia dehan, iha momentu istóriku hanesan ne’e, nu’udar timor-oan kontente ho transformasaun FALINTIL ba F-FDTL, tanba transformasaun sira ne’e hotu mak lori forsa agora sai indepedente liutan.
“Momentu hanesan ne’e ita tenke fó parabens ba ita-nia eroi no eroina sira hotu ne’ebé dedika ona sira-nia an ba mate. Tanba liuhosi sira-nia mate mak lori ita-nia forsa sira mai bele halo transformasaun ida ne’e,” Don Virgílio Kardeál do Carmo da Silva, hateten ba jornalista sira iha Cámara Eclesiástica Lecidere, Dili.
Nune’e, Don Virgílio Kardeál dehan iha momentu istóriku ida hanesan ne’e nu’udar timor-oan hanoin buat rua de’it. Primeiru hanoin katak sira ne’ebé fakar ona sira-nia raan ba rai ida ne’e no sigundu ba sira nu’udar fiar na’in nune’e Nai Maromak bele simu sira iha nia reinu lalehan.
“Ita ne’ebé sei moris haree ba oinsá mak ita mós kontinua eroi no eroina sira-nia espíritu patriotízmu no nasionalizmu ninian ne’e bele mós kuda iha jerasaun foun nian, ba dezenvolvimentu nasaun nian, mellora ita-nia rai liuhosi ita-nia eroi sira ne’ebé fakar ona sira-nia raan,” nia dehan.
Don Virgílio Kardeál mos husu hotuhotu nia orsaun ba instituisaun F-FDTL nune’e, sai lutu ne’ebé di’ak ba rai doben Timor-Leste..
Jornalista : Arminda Fonseca
Editora : Armandina Moniz
