DILI, 02 fevereiru 2023 (TATOLI)— Arsebipu Arkidioseze Metropolitana Dili, Don Virgílio Kardeál do Carmo, da Silva, SDB hateten, parte igreja sei halo orasaun própriu ida ba eleisaun parlamentár ne’ebé sei akontese iha tinan 2023 ne’e.
Arsebipu Arkidioseze Metropolitana Dili, Don Virgílio Kardeál do Carmo, da Silva, hato’o lia hirak ne’e bainhira Prezidente Komisaun Nasional Eleisaun (CNE, sigla portugés), José Belo ho nia komitiva kinta ne’e, ba hasoru malu ho Don Virgílio hodi ko’alia kona-ba preprasaun eleisaun parlamentár.
Don Virgílio dehan, objetivu Prezidente CNE ho nia komitiva hasoru uma-kreda ne’e relasiona ho eleisaun parlamentár ne’ebe besik dadaun ona. Sira mai aprezenta oituan ba uma-kreda, saida mak uma-kreda bele halo hamutuk ho CNE hodi promove liutan paz no estabilidade hodi hasoru eleisaun ne’ebé sei mai.
“Mensajen igreja nia ba kontribuisaun iha eleisaun ne’e mak husu atu labele insulta malu, no oinsá ita bele kria paz iha eleisaun nian. Ami sei ko’alia mós iha konferensia episkopal atu nune’e bele halo orasaun proporiu ida ba eleisaun parlamentár nian no orasaun ne’e rasik antes fulan ida halo kampaña no eleisaun. Orasaun ne’e sei fahe ba parókia no sarani hotu nune’e kada domingu bele reza no sarani sira kalan mos bele reza iha uma,” Don Virgílio Kardeál do Carmo da Silva, hateten ba jornalista sira iha Cámara Eclesiástica Lecidere, Dili.
Nia dehan, aleinde uma-kreda halo orasaun própriu ba eleisaun nian sira mós iha hanoin posibilidade iha loron ne’ebé dehan silénsiu ninian hosi kedas dioseze to’o parókia molok ba eleisaun parlamentár bele halo misa atu eleisaun bele la’o di’ak no iha paz nia laran.
Maibé antes ba eleisaun CNE mós iha ona hanoin sei halo semináriu boot ne’ebé involve parte hotuhotu atu trata kona-ba oinsá bele kria paz iha eleisaun nian.
“Hosi semináriu parte igreja ninian disponibilidade partisipa hodi kontribui saida mak uma kreda bele kontribui,” nia dehan.
Iha fatin hanesan, Prezidente CNE, José Belo hateten objektivu hasoru malu ho Don Virgílio ne’e ko’alia ligadu ba elisaun parlamentár nian.
“Ita hakarak eleisaun ida bele la’oiha paz ba ema hotu. Timor-oan tenke servisu hamutuk tanba ida ne’e determinasaun ba timor-oan, nune’e ita mai hamutuk ho uma-kreda oinsá servisu ba paz nian durante eleisaun ne’e rasik,” nia hateten.
Kona-ba preprasaun ba eleisaun parlamentár ne’e, CNE prepradu no hein Prezidente Repúblika dekreta data eleisaun hafoin konsultasaun ne’ebé halo ho partidu sira ho Governu.
“Orgaun eleitoral sira prontu preparadu kualker situasaun hoasu eleisaun, bainhira iha ona data fiksu,” nia dehan.
Jornalista : Arminda Fonseca
Editora : Armandina Moniz
