IBTL realiza graduasaun etapa dahuluk ba estudante 20-resin iha 07 fevereiru
DILI, 02 fevereiru 2023 (TATOLI)–Institutu Ensinu Superiór Privadu Boaventura Timor-Leste (IBTL) iha Manufahi preparadu ona atu realiza serimónia graduasaun etapa dahuluk ba estudante hamutuk na’in 20-resin iha 07 fevereiru 2023.
Reitora Institutu Ensinu Superior Privadu Boaventura Timor-Leste, Quitéria da Costa, hateten graduasaun ida-ne’e kategoria foin ba dahuluk hafoin IBTL eziste nu’udar Institutu ensinu superiór ida iha nasaun ne’e.
“Ita termina ona kalendáriu graduasaun ba estudante IBTL nian tanba ita-nia proposta graduasaun ne’ebé ita submete ba Ministériu Ensinu Superiór Siénsia no Kultura ne’e konsege hetan ona verifikasaun no lista estudante sira-nian públika ona iha jornál da Repúblika,” nia hateten ba Agência Tatoli liuhosi telefónika, kuarta ne’e.
Maibé, nia haktuir lista fiksu estudante IBTL nian ne’ebé atu simu graduasaun iha loron 7 fevereiru semana oin ne’e sei hatene loloos iha loron 06 fevereiru 2023, tanba agora daudaun iha estudante lubuk ida mak sei tuir hela ezame monografia.
Nia dehan, estudante 20-resin prepara ona atu tuir graduasaun ne’e mai hosi fakuldade rua mak hanesan fakuldade Ekonomia no Fakuldade Tékniku, bo estudante sira-ne’e sei akaba sira-nia estudu iha fakuldade rua ne’e ho grau akadémiku baxarelatu diploma III.
IBTL ninia ezisténsia tama ona tinan haat liu sei kontinua nafatin ho fakuldade haat mak hanesan Fakuldade Ekonomia jestaun, Fakuldade Tékniku Sivíl, Fakuldade Saúde Públiku Enfarmajen no Fakuldade Agrikultura.
Hosi fakuldade haat ne’e, fakuldadu rua mak hetan ona lisensa mak hanesan Fakuldade Ekonomia jestaun no Fakuldade Tékniku Sivíl,
Enkuantu Fakuldade Saúde Públiku Enfarmajen no Fakuldade Agrikultura daudaun ne’e sei iha hela faze preparasaun atu hein avaliasaun programátiku hosi Ajénsia Nasionál Avaliasaun Akreditasaun Akadémiku (ANAAA), no oras ne’e daudaun totál estudante iha Institutu Ensinu Superiór Privadu ne’e hamutuk 200-resin.
Jornalista : Tomé Amado
Editór : Cancio Ximenes
