Profesór na’in-ualu hosi Indonézia sei apoiu programa doutoramentu-mestradu iha UNPAZ
DILI, 02 fevereiru 2023 (TATOLI)–Reitór Universidade da Paz (UNPAZ), Adolmando Amaral, relata UNPAZ realiza ona asina akordu memorandu entebdimentu ho universidade haat iha Indonézia atu buka profesór na’in-ualu (8) espertu iha area administrasaun públiku no enjeñaria atu mai hanorin iha programa estudu doutoramentu no mestradu iha UNPAZ.
“ami nia planu kuandu profesór espertu na’in ualu (8) atu mai apoiu programa estudu doutoramentu no mestradu iha UNPAZ ne’e mak iha ona ami-nia aula dahuluk ne’e, sei realiza iha dies Natalis UNPAZ nian ne’ebé sei realiza iha loron 9 marsu fulan oin,” Adolmando Amaral hateten ba Agência Tatoli iha kampus UNPAZ, kinta ne’e.
Tanba, nia dehan, UNPAZ lansa tiha ona ninia programa estudu foun sira hosi doutoramentu no mestradu nian ba públiku. ne’e duni programa estudu doutoramentu no mestradu atu loke iha UNPAZ ne’e presiza hetan dosente ka profesór ida tenke ema-ne’ebé peritu iha área administrasaun públiku no enjeñaria.
Reitór UNPAZ ne’e dehan, haree ba kooperasaun ne’ebé UNPAZ halo ona ho parseiru sira hosi Universidade haat iha Indonézia hanesan Universidade Undana, Universidade Armadewa, Universidade Udayana Bali no ITS Surabaya ne’e, nu’udar pasu ida importante tebes hodi loke nafatin dalan ba UNPAZ atu hatutan tan kooperasaun ba oin.
Ho kooperasaun ne’ebé UNPAZ halo ona ne’e mak kontinua delega ninia Dekanu na’in-haat hosi fakuldade enjeñaria, Siénsia Humaniora no siénsia de Diretu ba universidade haat refere atu kontinua asina memorandu entendimentu hodi husu apoiu dosente na’in-ualu iha programa estudu rua doutoramentu no mestradu ne’ebé sei realiza iha tinan ida-ne’e.
Adolmando haktuir katak memorandu ida-ne’e atu espouz programa estudu UNPAZ nian ba sira tanba UNPAZ hakarak hetan duni profesór na’in-ualu maibé tenke peritu duni iha área administrasaun públiku no area enjeñaria nian, tanba ne’e UNPAZ asina memorandu ho universidade haat iha Indonézia ne’e atu sira bele aprezenta profesór espertu na’in sira hodi mai tulun UNPAZ.
Bainhira iha ona profesór na’in-ualu espertu iha area rua ne’e maka prontu mai hanorin programa estudu Doutoramentu no Mestradu iha UNPAZ ninia lala’ok maka kada semestre iha matéria haat, profesór na’in-haat sei apoiu iha estudu Doutoramentu no na’in-haat iha Mestradu.
Jornalista : Tomé Amado
Editór : Cancio Ximenes
