Bulgaria hakarak fó formasaun ba funsionáriu MNEK

DILI, 03 fevereiru 2023 (TATOLI) – Embaxadór Bulgaria iha Indonezia no Timor-Leste, Petar Andonov, hateten hakarak fó formasaun ba funsionáriu Ministériu Negósiu Estranjeiru no Kooperasaun (MNEK) nian atu bele tulun Timor-Leste nia adezaun ba ASEAN.

“Ami hakarak fó formasaun ba funsionáriu sira iha MNEK, formasaun ne’ebé ami atu fó ne’e importante tebes oinsa atu ajuda Timor-Leste nia adezaun ba ASEAN”, embaxadór hateten hafoin remata reuniaun ho Primeiru-Ministru Taur Matan Ruak, iha Palásiu Governu, foin lalais.

Nia dehan, formasaun ne’ebé atu fó ne’e, liuliu esperiénsia Bulgaria nian tanba Bulgaria mós uluk atu tama ba membru Uniaun Europeia liuhosi prosesu ne’ebé naruk to’o ikus tama duni.

“Ami iha esperiénsia oinsa atu tama iha organizasaun rejionál ida, ami mós uluk atu tama ba membru UE difísil maibé ami konsege tama, Timor-Leste mós agora atu tama ba membru ASEAN liuhosi prosesu ne’ebé naruk ami bele fahe ami nia esperiénsia, ita servisu hamutuk hodi tulun malu”, nia relata.

Aleinde ne’e, Bulgaria mós hakarak fó formasaun ba funsionáriu iha Ministériu Kordenadór Asuntu Ekonómika (MEKAE) no Ministériu Turizmu Komérsiu Indústria (MTKI) atu bele ajuda Timor-Leste nia adezaun ba ba Organizasaun Mundiál Komérsiu (OMC-sigla Portugés).

“Ha’u bele husu ou koalia ho Ministériu Ekonomia Bulgaria atu mai fó formasaun ba funsionáriu sira iha MEKAE no MTKI, atu prepara bainhira Timor–Leste hola parte ona hanesan membru OMC bele hatene ona servisu saida mak sei halo”, nia haklaken.

Nia afirma, kona-ba formasaun hirak ne’e atu realiza iha tempu besik depende ba Diretór Jerál Diplomasia Bulgaria no Diretór Nasionál MNEK ne’ebé trata asuntu exteriór.

Fó hanoin fali, relasaun diplomasia entre Bulgaria no Timor-Leste, hahú akordu iha 21 janeiru 2003 no agora daudaun kompleta ona tinan 20 kooperasaun entre nasaun rua iha área diplomasia.

Jornalista: Hortencio Sanchez

Editór : Zezito Silva