Kroasia hakarak ajuda TL kona-ba dezenvolvimentu turizmu
DILI, 03 fevereiru 2023 (TATOLI) – Embaxadór Króasia iha Timor-Leste Neojsa Koharovic, hakarak koopera ho Timor-Leste hodi dezenvolve poténsia turístika.
“Timor–Leste ho Króasia nia istória luta kuaze hanesan, ita tenke iha kooperasaun ne’ebé di’ak hodi dezenvolve setór turizmu, ami sei fahe esperiénsia kona-ba turizmu nian, imi hatene Króasia nasaun ida ne’ebé kiik ho populasaun hamutuk millaun haat-resin, ita sei kompleta malu”, embaxadór dehan hafoin hasoru malu ho Primeiru-Ministru, Taur Matan Ruak, iha Palasiu Governu.
Nia hatutan, esperiénsia ne’ebé Króasia iha sei fahe, ida ne’e importante tebes atu tulun ekonomia Timor-Leste nian tanba iha Króasia dezenvolvimentu turizmu la’o di’ak tebes no kada tinan hatama reseita ba Estadu millaun $20-resin.
“Nasaun kiik hanesan Timor-Leste ho Króasia, persiza kuidadu no fó ita-nia esforsu tomak ba multilaterializmu, tanba multilaterialzmu hanesan dalan di’ak ida bele prezerva no asegura ezisténsia ita-nia nasaun”, nia haklaken.
Nune’e mós, Embaxadór ho Xefe Governu koalia kona-ba oinsa harii nasaun bainhira nasaun ida foin mak hetan ukun rasik-aan, oinsa estratejia atu halo dezenvolvimentu hodi fó moris di’ak ba ema hotu.
“Prosesu harii nasaun mak presiza dezenvolve iha área hotu ne’ebé iha poténsia atu hatama osan ba Estadu, ida fali mak dezenvolvimentu institusionál demokrátiku no reziliente demokrasia iha nasaun”, nia esplika.
Nia rekorda, Króasia esforsu makas hela atu adere ba Uniaun Europeia (EU) no Timor-Leste mós esforsu hela atu adere ba ASEAN ho esforsu hirak ne’e sei fó solusaun di’ak ba nasaun rua iha futuru.
Jornalista: Hortencio Sanchez
Editór : Zezito Silva
