Servisu saúde RAEOA koordena ona SAMES fornese ai-moruk
OÉ-CUSSE, 03 fevereiru 2023 (TATOLI) – Servisu saúde iha Rejiaun Administrativa Espesiál Oé-Cusse Ambeno (RAEOA), daudaun ne’e koordena ona ho Servisu Autonomu Medikamentu no Ekipamentu Saúde (SAMES) hodi fornese ai-moruk ba Hospitál referál Oé-Cusse hodi distribui ba fasilidade saúde iha territóriu rejiaun ne’e.
Sekretáriu Rejionál ba Asuntu Saúde, Manuel da Costa, rekoñese iha Oé-Cusse postu saúde no sentru saúde balu iha área remota falta ai-moruk tanba tanba situasaun tempu udan koodenasaun entre ospitál ho fasilidade saúde iha área remota ladún la’o di’ak, nune’e nia parte koordena ho ba sentrál liuhosi SAMES atu fornese ai-moruk.
“Servisu saúde RAEOA iha kooperasaun ho SAMES, atubele apoia ai-moruk, ita laiha problema, foin daudaun ita enfrenta problema ai-moruk item balu mai tarde, maibé agora koordenasaun ba SAMES ne’ebé iha tempu sei fornese ona mai iha Oé-Cusse,” Sekretáriu Rejionál ba Asuntu Saúde, Manuel da Costa, informa ba jornalista sira Oé-Cusse, sesta ne’e.
Sekretáriu rejionál ne’e, informa, iha postu saúde balu enfrenta problema tanba ai-moruk mai tarde, maibé espera tempu badak sei distribui ona ba fasilidade saúde sira, nune’e bele kontinua fó atendimentu ba komunidade sira.
Dirijente saúde esplika, tipu ai-moruk ne’ebé SAMES fornese ba fasilidade iha Oé-Cusse kuazu hotu-hotu ne’ebé bainbain fó atendimentu ba pasiente sira iha ospitál referál Oé-Cusse, tanba selbarasaun akordu ne’ebé Autoridade RAEOA ho SAMES selebra ba item hotu-hotu.
Notísia relevante: SAMES oferese ai-moruk-ekipamentu médiku ba Hospital Referál Oé-Cusse
Jornalista : Abílio Elo Nini
Editór : Evaristo Soares Martins
