DILI, 03 fevereiru 2023 (TATOLI) – Juiz Administradór Tribunál Distritál Dili (TDD), Afonso Carmona, hateten TDD sei kordena ho Diresaun Jerál Patrimóniu Estadu Ministériu Finansa (MF), atu halo leilaun motorizada 100-resin ne’ebé para hela iha resintu TDD nian.
“Ita bo’ot sira hatene motorizada sira ne’ebé maka daudaun ne’e para iha resintu Tribunál Distritál Dili (TDD) hamutuk 100-resin, motór sira ne’e maioria nudar evidénsia krime. Ha’u hanesan Juiz Administradór TDD kordena ona ho Diresaun Jerál Patrimóniu Estadu Ministériu Finansa atu halo leilaun ba motorizada sira ne’e”, Afonso Carmona dehan ba jornalista sira iha TDD, sesta ne’e.
Nia dehan, mortorizada hirak ne’e, Ministériu Públiku aprezenta mai Tribunál.
“Ita hatene Ministériu Públiku mak normalmente halo investigasaun, bainhira Tribunál iha prosesu julgamentu husu Ministériu Públiku aprezenta evidénsia sira ne’e mai Tribunál atu Tribunál bele konfirma iha faktu ne’ebé hakerek iha akuzasaun ne’e’bé Ministériu Públiku submete ba Tribunál katak evidénsia maka ne’e”, Afonso Carmona hateten.
Tanba ne’e, iha prosesu julgamentu sempre hanesan ne’e, kuandu Tribunál husu MP atu aprezenta evidénsia krime, nune’e Tribunál bele konfirma iha faktus ne’ebé MP aprezenta mai Tribunál.
“Tanba ne’e, ita bo’ot sira haree iha resintu Tribunál Distritál Dili nian, hosi oin to’o kotuk nakonu ho motorizada sira, maibé ita esforsu ona atu hamamuk resintu TDD, nune’e bele fó espasu ba motór ho karreta no ema bele livre halo movimentu”, nia revela.
Afonso hateten motorizada sira ne’e maioria para kle’ur ona iha TDD durante besik tinan10.
“Motorizada sira iha ne’e, barak liu mai hosi kazu naok motor hosi Grupu Naokten Rona Malu (NAKROMAN) ne’ebe uluk ita bo’ot sira rona no Tribunál hasai ona desizaun katak prosesu hotu ona no autoriza nain hosi motór sira ne’e bele mai foti sira nia motór iha ne’e. Maibé to’o agora nain ba motór lakohi mai foti sira nia motorizada, entaun motór sira ne’e rai kle’ur to’o agora lakohi mai foti”, nia konklui.
Jornalista: Natalino Costa
Editór : Zezito Silva
