DILI, 06 fevereiru 2023 (TATOLI)— Ministériu Transporte no Komunikasaun (MTK), liuhosi Diresaun Nasionál Meteorolójia no Jeofíziku (DNMG, sigla portugés) fó sai previzasaun tempu ba semana ne’e, probabilidade boot sei akontese udan hahú intensidade hosi fraku ba forte iha territóriu laran tomak.
Bazeia ba nota komunikadu ne’ebé Agência Tatoli asesu segunda ne’e, probabilidade sei akontese udan hahú hosi intensidade fraku ba forte ne’e. Udan sei akontese hahú hosi loron 07 to’o 12 fevereiru 2023 liuliu iha parte foho sira.
“Bainhira Udan bo’ot husu ba populasaun sira hadook aan nafatin hosi fatin risku sira no buka hela iha fatin ne’ebé seguru. Karik iha kazu emerjénsia ruma ka presiza halo evakuasaun, mantein kalma nafatin, evita pániku no halo tuir orientasaun autoridade lokal ka pesoál protesaun sivil ne’ebé besik,” hakerek nota komunikadu ne’e.
Hosi akontesimentu udan refere, ba munisípiu sira ne’ebé tenke iha atensaun espesiál mak hanesan, Manatuto, Viqueque, Lautém, Baucau, Ermera, Bobonaro no Rejiaun Administrativa Espesiál Oé-Cusse Ambeno (RAEOA) maibé atensaun mós ba munisípiu sira seluk.
Jornalista : Arminda Fonseca
Editora : Armandina Moniz
