Inísiu fevereiru: APC rejista ema nain-rua lakon vida tanba dezastre naturál

DILI, 06 fevereiru 2023 (TATOLI) – Diretór Relasaun Externa no Komunikasaun Autoridade Protesaun Sivíl (APC, sigla portugés) Anacleto Caetano, informa APC rejista ema nain-rua lakon vida tanba dezastre naturál, hahú iha 1-6 fevereiru.
“Inísiu fevereiru, hosi loron 1 to’o loron 6, ami rejista kazu ema na’in-rua lakon vida, kauza hosi dezastre natural, hanesan ahi-han uma ida iha Munisípiu Baucau ne’ebé rezulta ema ida mate no ai-hanehan uma ida iha Munisípiu Ermera”, Anacleto Caetano dehan ba jornalista sira iha edifísiu APC, Caicoli, segunda ne’e.
Nia esplika, motivu inséndiu iha Baucu, ne’e uma nain sunu lilin, haluhan la hamate to’o ahi-han uma no rezulta uma nain mós ahi han hotu.
“Dezastre inséndiu iha Baucau ne’e, rezulta vítima Maria Guterres (64), tenke lakon vida, tanba kauza hosi dezastre inséndiu ahi-han uma no la konsege salva nia vida, ahi han motuk nia.Tuir informasaun ne’ebé ami nia ekipa sira relata mai katak iha kalan, molok toba, vítima sunu lilin iha uma-laran, maibé molok toba nia haluhan atu hamate lilin ne’ebé nia sunu, ikus mai rezulta ahi-han uma ne’e, inklui vítima rasik motuk iha uma-laran’’, Anacleto Caetano esplika.
Enkuantu vítima ida hosi Munisipiu Ermera, tanba akontese anin, halo ai-monu, hodi hanehan uma ida, no rezulta vítima Afredo Salsinha mate fatin inklui vítima Julito Salsinha, kondisaun kanek grave iha nia-isin.
“Depois akontesimentu ne’e, família sira tenta evakua vítima na’in-rua mai atu halo tratamentu saúde iha Hospital Nasionál Guido Valadáres (HNGV), Bidau, maibé, infelizmente, la konsege salva vítima Afredo Salsinha nia-vida no mate. Enkuantu, vítima Julito Salsinha, oras ne’e sei hala’o tratamentu iha HNGV”, nia dehan.
Nia informa, mosu mos erozasaun (rai halai) iha área Emera nia estaga uma ida, maibé la rezulta vítima kanek.
APC rejista ema nain-rua maka mate iha inísiiu fulan fevereiru no uma-rua maka ida ahi han, ida ai-hanehan no ida sofre erosaun ka rai halai”, Anacleto hateten.
Nia dehan, hafoin akontesimentu, ekipa APC halo kedan intervensaun hodi fó apoiu emerjénsia ai-han ba família sira ne’ebé afetadu ba dezastre naturál ne’e.
“Ami nia kolega sira Autoridade Protesaun Sivil hamutuk ho Ministériu Solidariedade Sosiál no Inklusaun (MSSI) fó ona apoiu ba família matebian sira ne’ebé maka mate tanba kauza dezastre naturál hosi Munisipiu Baucau no Emera. Ami fó apoiu emerjénsia food item ho non food item ka apoia ai-han no laos ai-han”, Anacleto refere.
Nia husu ba komunidade sira iha Munisípiu Ermera ho Ainaro atu kuidadu aan, tanba mosu udan ho intensidade forte.
“APC husu ba populasaun sira tomak iha territóriu nasionál atu kuidadu aan nafatin, tanba daudaun iha hela situsaun udan no dalaruma mosu anin bo’ot, ita bo’ot sira bele hasees aan hosi fatin risku sira dezastre nian, atu prevene hosi dezastre naturál sira ne’ebé mosu”, nia konklui.
Jornalista:Natalino Costa
Editór : Zezito Silva

