DILI, 06 fevereiru 2023 (TATOLI) – Jogadór timoroan na’in-rua hosi Sentru Treinamentu Futeból Juvenil Baucau, ohin hala’o despedida ho Sekretariu Estadu Juventude no Desportu (SEJD) Abrão Saldanha, hodi aranka ba tuir formasaun futeból iha Klube IBIUNA FC iha sidade São Paulo Brazil durante tinan ida.
“Ohin ita despede alin na’in-rua tanba sira aranka ba Brazil hodi treinu iha klube ida iha Brazil, klube iha Brazil ne’e observa sira na’in-rua nia jogu kapas, entaun haruka sira tuir treinamentu iha ne’ebá durante tinan ida, karik haree mak sira nia performe di’ak mak sei extende tan sira-nia treinamentu”, Abrão hateten iha edifísiu SEJD, ohin.
Jogadór na’in-ua ne’e mak Ario Melio Ximenes no Roberto Olivio Costa sei tuir treinamentu iha klube Ibiuna FC iha sidade São Paulo Brazil.
Iha biban ne’e, jogadór Ario agradese ba Governu Timor-Leste no klube Ibiuna tanba koopera no haruka sira ba tuir treinamentu iha ne’ebá atu bele prepara fini jogadór Timor-Leste nian.
“Agradese tebes ba Governu no klube Brazil nian, iha ne’ebá ami sei hatudu hahalok di’ak no foku ba treinamentu”. dehan jogadór Ario.
Iha sorin seluk, jogadór Roberto sente kontente tanba bele hetan oportunidade tanba ema barak esforsu maibé la konsege hetan ho nune’e sei kuidadu ho oportunidade ne’e ho responsabilidade.
“Ema hotu mehi hakarak hanesan ami, maibé difísil, entaun ami ne’ebé hetan ona oportunidade ne’e sei mantein ami-nia disiplina tanba lori nasaun nia naran mak ba treinu”, Roberto dehan.
Viajen hosi Timor-Leste ba Brazil, finansia hosi SEJD ho totál orsamentu hamutuk rihun $13,500 kompostu hosi han hemu iha dalan no tikete aviaun.
Bainhira to’o ona iha Brazil mak klube sei toma responsabilidade másimu ba jogadór na’in-rua ne’e durante tinan ida.
Antes ne’e, SEJD anunsia ona jogadór ne’e atu aranka iha 29 janeiru liubá maibé tanba iha fallansu dokumentu, jogadór rua ne’e sei presiza hadia no ohin foin bele aranka.
Jornalista: Hortencio Sanchez
Editór : Zezito Silva
