Eskola 62 preparadu atu inaugura iha faze daruak
DILI, 07 fevereiru 2023 (TATOLI)–Diretór Nasionál Dezenvolvimentu Parque Eskolár (DNDPE), Agostinho Soares, hateten ekipa tékniku sira submete ona relatóriu katak iha ona eskola hamutuk 62 ne’ebé tama iha projetu komunitária preparadu ona atu inaugura ba faze daruak.
“Ha’u simu ona relatóriu iha semana kotuk, mai hosi ha’u-nia ekipa tékniku sira katak eskola 62 mak identifikadu ona iha tempu besik ne’e sei konklui prosesu reabilitasaun hodi prepara ba prosesu inaugurasaun faze daruak,” Agostinho Soares hateten ba Agência Tatoli iha ninia kna’ar fatin Ministériu Edukasaun Juventude no Desportu (MEJD) Vila Verde, tersa ne’e.
Hosi relatóriu ne’ebé mak tékniku sira aprezenta ne’e hateten katak eskola 62 ne’e mai hosi munisípiu 12 maibé iha númeru eskola ne’ebé barak liu maka hosi mMunisípiu tolu mak hanesan Bobonaru, Ermera no Covalima, no munisípiu ualu seluk (8) ninia númeru projetu ne’ebé besik konklui ona menus hosi hitu (7).
“Hosi projetu hamutuk 58 ne’ebé kompostu hosi munisípiu 12 ne’e, ita-nia tékniku sira informa katak iha Munisípiu tolu mak ninia númeru projetu eskola aas liu mak Munisípiu Bobonaro iha eskola hamutuk ualu (8), Ermera iha projetu komunitária ba eskola hitu (7) no munisípiu Covalima iha projetu eskola hitu (7),” nia dehan.
No entantu Munisípiu sia (9) seluk mak hanesan Aileu iha projetu lima (5) de’it, Manufahi iha projetu seis (6) Dili iha projetu haat (4) Vikeke projetu lima (5) Ainaru projetu tolu (3) Lau-tem projetu lima (5) Baukau projetu neen (6), no Manatutu iha projetu ida (3) ne’ebé foin maka tama iha faze daruak ne’e. no Likisá iha projetu tolu (3)
Enkuantu ekipa tékniku sira kontinua hala’o nafatin sira-nia servisu iha hela terrenu hodi halo nafatin monitorizasaun ba projetu sira-ne’e, atu garante duni katak eskola sira-ne’ebé atinje progresu hodi prepara ba inaugurasaun iha faze daruak ne’e.
Fiar katak iha tempu besik sira mós sei aprezenta tan relatóriu bele justa hamutuk ho munisípiu sira seluk ne’ebé preparadu ona atu hakarak inaugurasaun faze daruak.
Tuir nia, eskola 58 ne’ebé preparadu ona atu hetan inaugurasaun iha faze daruak ne’ebé maiória hosi projetu komunitária no eskola sira-ne’e kompostu hosi Ensinu Báziku (EB) no Edukasaun Pre-Eskolár (EPE).
Iha ona informasaun katak eskola sira-ne’e sei inaugura iha marsu nia klaran, iha tinan-ida ne’e.
Totál projetu komunitária hamutuk 202 ne’ebé mak hetan ona inaugurasaun ne’e hamutuk 87, no sei falta eskola 115 mak sei iha prosesu nia laran.
Orsamentu ne’ebé prevee ba projetu Konstrusaun Reabilitasaun (PKR) ne’e hamutuk Millaun $20 resin.
Jornalista : Tomé Amado
Editór : Cancio Xiemenes
