Estudante mellór klasifikadu 722 iha Oé-Cusse tama lista bolsa méritu

OÉ-CUSSE 07 fevereiru 2023 (TATOLI) –Sekretária Rejionál ba Asuntu Edukasaun no Solidariedade Sosiál, Avelina da Costa, informa, estudante ne’ebé tama iha lista mellór klasifikadu hodi asesu ba bolsa méritu, iha RAEOA hamutuk 722, mai hosi ensinu báziku, sekundáriu jerál no sekundáriu tékniku vokasionál.

“Totál estudante ne’ebé sai benefisiáriu iha bolsa méritu hamutuk 722 mai hosi nível eskola, nível rejionál no nível nasionál, komposta hosi ensinu báziku, sekundáriu jerál no sekundáriu tékniku vokasionál,” Avelina da Costa hatete iha Oé-Cusse tersa ne’e.

Dirijente edukasaun ne’e, esplika, nível eskola, ne’e iha pasajén klase katak, iha Ensinu Báziku (EB) ba kuartu-anu pasa ba kintu-anu asesu bolsa méritu, iha primeiru to’o kintu klasifikasaun, no mós ba sestu-anu pasa ba sétimu-anu ba Ensinu Báziku Sentrál (EBC, sigla portugés), ne’e mós iha primeiru to’o kintu klasifikasaun, iha eskola sekundáriu jerál ho tékniku vokasionál, fornese bolsa méritu ba pasajén klase iha désimu-primeiru to’o désimu segundu ano, ida-ne’e mós primeiru to’o kintu klasifikasaun.Ba fali nível rejionál ne’e, bazea ba rezultadu ezame nasionál nian tanba koresaun ba valór halo iha nasionál servisu edukasaun munisipíu hein simu naran de’it, ho primeiru to’o terseiru klasifikasaun de’it.

“Daudaun ne’e ita halo ona pagamentu ba estudante balu tanba loke ona konta bankária, balu sei kompleta dokumentu tanba dadús ne’e, mai hosi estudante ensinu báziku eskola 61, eskola sekundáriu haat (4) no eskola tékniku vokasionál tolu (3),” nia afirma.

Maske nia la esplika detalla kona-bá dadus estudante sira mai hosi eskola maibé bazea fundu orsamentu ne’ebé MEJD aprova maka hanesan;

Ba ezame nasionál ba ensinu báziku aloka $36,000.00 ensinu sekundáriu jerál ba nivél nasionál hamutuk $9,000.00 ezame pasajén klase iha $10,000.00, tékniku vokasionál ba nível nasionál hamutuk $6,750.00, ba ezame pasajén klase iha $7,500.00, nune’e mós ba estudante sira iha nível eskola ba ensinu báziku ba pasajén klase nian maka $150,500.00.

Entretantu, tuir dadus ne’ebé Agência Tatoli asesu, antes ne’e parte MEJD prevee orsamentu hamutuk millaun $7,2 ba estudante identifikadu sai mellór klasifikadu iha territóriu tomak.

Nune’e ba primeiru klasifikadu sei hetan $600,00, segundu klasifikadu hetan $550,00, terseiru klasifikadu hetan $450,00 no kuartu klasifikadu sei hetan $400,00.

Jornalista: Abílio Elo Nini
Editór: Evaristo Soares Martins