DILI, 07 fevereiru 2023 (TATOLI) – Fundasaun Alola kontinua halo sensibilizasaun hodi hasae koñesimentu no konsiénsia ema nian ba perigu moras kankru no importánsia husi deteta sedu.
“Ami nafatin halo sensibilizasaun no hasae koñesimentu komunidade nian ba moras kankru hodi deteta sedu”, Diretora Ezekutiva Fundasaun Alola Maria Imaculada Guterres, dehan iha komemorasaun loorn mundiál kankru iha salaun pusat Budaya Indonesia, Mascarinhas, ohin.
Nia dehan, bainhira hatene ona informasaun kona-ba kankru, liuliu fatór risku sira ne’ebé hamosu moras ne’e rasik, sira bele halo deteta sedu hodi lori ba fasilidade saúde.
“Husi parte organizasaun, ami halo esforsu lubuk ida maibé ami halo la’os iha nasionál maibé ami halo to’o iha área remota hodi hasa’e komunidade nia konsiénsia no mós ami halo ba estudante sira kona-ba perigu husi moras kankru no importánsia husi deteta sedu ba iha moras kankru ne’e rasik hodi bele garantia salva moris”, nia afirma.
Advokasia ne’ebé mak Fundasaun Alola halo mak ba ema sira ne’ebé foti desizaun liuliu aproxima ba parte relevante sira katak Governu presiza tau matan no atensaun ba kuidadu kankru iha rai-laran. Tanba durante ne’e pasiente moras kankru nia tratamentu halo iha rai liur.
Iha fatin hanesan Representante Ministériu Saúde Nilton do Carmo da Silva, informa Ministériu Saúde nafatin halo sensibilizasaun ba populasaun sira kona-ba moras kankru no oinsa atu halo prevensaun sedu.
“Ita nia nivél koñesimentu iha área saúde presiza reforsa tanba bainhira afeta ona moras sira hanesan kankru tenke hodi ba fasilidade saúde hodi halo tratamentu maibé ita iha ne’e banhira moras ba uluk tradisionál, entaun ida ne’e mak sai problema ba ita tanba ne’e husu populasuan sira bainhira moras ruma mai fasilidade suade hodi hetan atendimentu lalais”, Nilton do Carmo da Silva subliña.
Entertantu profisionál saúde ne’ebé partisipa iha workshop hodi komemorasaun loron mundiál kankru ida ne’e hamutuk 50 husi Sentru saúde Metinaro, Vera Cruz, Comoro, Formoza no Becora.
Jornalista : Felicidade Ximenes
Editór : Zezito Silva
