Futeból Timor-Leste prontu partisipa SEA Games Kamboja

DILI, 07 fevereiru 2023 (TATOLI) – Diretór Tékniku Federasaun Futeból Timor-Leste (FFTL) Gaspar Quintão, dehan futeból Timor-Leste prontu partisipa iha SEA Games ne’ebé sei hala’o tinan ne’e iha Kamboja.

“Durante ne’e FFTL sempre partisipa iha reuniaun hamutuk ho Komite Olímpiku Nasionál Timor-Leste (CONTL-sigla portugés), Konfedersaun Desportiva Timor-Leste (CDTL-sigla portugés) no Sekretariu Estadu Juventude no Desportu (SEJD), entaun ami hatene ona kona-ba atu ba partisipa iha eventu rejionál ne’e, ne’ebé futeból sei partisipa”, Diretór hateten ba Agência TATOLI iha edifísiu FFTL, ohin.

Nia dehan daudaun ne’e FFTL seidauk halo selesaun ba jogadór sira maibé iha tempu besik sei halo selesaun ba jogadór.

“Ita seidauk halo selesaun ba jogadór sira, tanba sei hein hela treinadór aban foin to’o mai, bainhira nia mai ita servisu hamutuk, bainhira liga abertura iha 17 fevereiru agora ita foin hetan jogadór ne’ebé di’ak”, Quintão saliente.

Nia esplika, tuir kritériu hosi SEA Games, jogadór ne’ebé atu partisipa iha jogu ne’e tenke idade 22 no iha posibilidade bele inklui mós jogadór seniór na’in-rua iha laran.

Totál jogadór futeból ne’ebé sei partisipa iha SEA Games hamutuk na’in 20 inklui ofisiál na’in-neen, nune’e hamutuk ema na’in-26 mak iha direitu absoluta hodi partisipa.

Treinadór selesaun nasionál ba SEA Games, FFTL kontrata hosi Korea Súl ho naran kompletu Park Soontae hodi substitui treinadór anteriór Fabio Maciel da Silva ne’ebé hakotu ona nia kontratu ho FFTL iha tinan ida ba kotuk.

Jogu ba SEA Games sei hala’o iha fulan maiu, iha nasaun Kamboja, sei partisipa hosi nasaun hamutuk 11 hanesan, Indonézia, Malázia, Thailandia, Filipina, Myanmar, Vietname, Kamboja, Laos, Brunei Darusalam no Timor-Leste.

Jornalista: Hortencio Sanchez

Editór : Zezito Silva