DILI, 07 fevereiru 2023 (TATOLI)–Ministériu Edukasaun Juventude no Desportu (MEJD) liuhosi Dirasaun Nasionál Dezenvolvimentu Parque Eskolár (DNDPE) deside estende prosesu reabilitasaun ba projetu komunitária 18 to’o jullu, tanba kondisaun terrenu la garante atu transporta materiál ba to’o iha fatin sira-ne’e.
Diretór Nasionál Dezenvolvimentu Parque Eskolár, Agostinho Soares, relata DNDPE deside hodi estende prosesu reabilitasaun eskola 18 ba to’o fulan jullu ne’e, tanba eskola 18 ne’e lokaliza duni iha área ne’ebé risku ba dezastre kuandu udan boot.
“Ita identifika ona iha munisípiu ualu (8) kuaze iha eskola hamutuk 18 mak tama iha risku mak hanesan munisípiu Ainaro, Baucau, Viqueque, Bobonaro, Ermera, Manufahi, Covalima no Manatutu. Bainhira udan boot defisil atu tula materiál konstrusaun sira, tanba ne’e ita estende sira-nia prosesu reabilitasaun to’o jullu. Bainhira iha bailoron mak ita bele hahú fali projetu komunitária ne’e,” Agostinho Soares hateten ba Agência Tatoli iha ninia servisu fatin, Ministériu Edukasaun Juventude no Desportu, Vila Verde, tersa ne’e.
Eskola sira-ne’ebé identifikadu tenke estende to’o jullu ne’e mak hanesan eskola EBF rua (2) iha Ainaro mak hanesan eskola Mane-Tu’u no eskola Mane Lobas, depois eskola tolu (3) iha Baucau mak hanesan eskola EBF ida iha Osokolariu ne’ebé lokaliza kedan iha matebian hun, depois eskola EBF ida iha Lalabou parte Laga nian no mós eskola EBF ida iha Abu Quelicai parte matebian hun ne’e mós kuandu udan makaas defisil atu asesu.
Nune’e mós, iha Bobonaru iha eskola EBF rua mak hanesan eskola OdelGomo no eskola Male-Ubu parte suku Hauba nian ne’e mós bainhira udan mak rai dodok no obriga tama de’it sei lori risku boot, no iha Ermera iha eskola haat (4) mak hanesan EBF Tidin Besi, EBF Katrai Kraik, EPE Raetrata no EBF Manuletu.
Iha Manufahi identifika eskola rua (2) mak EBF Tepo no EBF Blaro, eskola rua ne’e mós tuir relatóriu ne’ebé tékniku sira relata katak oras ne’e daudaun difisil atu asesu tanba rai kois no monu.
Iha Manatuto ne’e EBF ida iha Baha-Di’ik, agora hosi fali munisípiu Viqueque iha eskola tolu (3) mak EBF Edemumu, EBF Woe-bira no EBF Webobo no ikus liu iha Covalima iha eskola ida de’it mak EBF Usu-Kai.
Eskola hirak ne’e mak dirasaun konsidera labele atu konklui sira-nia projetu komunitária iha fulan-abríl ne’e, tanba atu lalin de’it fatuk mós defisil tebes entaun tenke hein bailoron mak foin bele hahú sira-nia projetu ne’e.
Jornalista : Tomé Amado
Editór : Cancio Ximenes
