DILI, 07 fevereiru 2023 (TATOLI) – Treainadór prinsipál klube segunda divizaun Liga Futeból Timor-Leste (LFTL) Santa Cruz FC Moises da Silva, halo ona selesaun ba jogadór hamutuk 23 hodi prepara ba liga époka 2022-2023.
“Santa Cruz mak tarde liu halo preparasaun maske klube barak halo ona preparasaun, semana kotuk ami foin halo selesaun ba jogadór hamutuk na’in 23 ne’ebé sei hamutuk ho Santa Cruz hodi enfrenta liga époka ne’e”, treinadór dehan ba Agência TATOLI iha kampu Federasaun Futeból Timor-Leste (FFTL), ohin.
Nia dehan, jogadór hirak ne’ebé selesionadu mesak timoroan inklui estranjeiru na’in ida hosi Ghana maibé hela kleur ona iha Timor-Leste.
Oráriu treinamentu ba jogadór sira dader no loraik iha kampu FFTL, hahú segunda to’o sesta. Tanba ne’e Santa Cruz preparadu no iha ambisaun atu ultrapasa ba primeira divizaun iha époka ne’e.
Rejistu iha LFTL, estrutura klube nian preparadu no iha tempu besik sei ba rejistu iha orgaun liga atu bele iha konfirmasaun loloos ba Santa Cruz nia partisipasaun ba liga tinan ne’e.
Jornalista: Hortencio Sanchez
Editór : Zezito Silva
