Estoke ai-moruk tipu 282 disponível iha armajen SAMES
DILI, 08 fevereiru 2023 (TATOLI) – Diretora Armajen Servisu Auotónomu Medikamentu Ekipamentu Saúde (SAMES) Saturnina Ximenes, dehan estoke ai-moruk tipu hamutuk 282 ka 55% disponível iha armajen.
“Ita-nia estock ai-moruk iha armajen SAMES ne’ebé daudaun disponível hamutuk item 282 ka 55% mak halo atendimentu ba fasilidade saúde sira iha territóriu nasionál no estoke ai-moruk mamuk iha armajen SAMES hamutuk item 233 ka 45%”, Saturnina Ximenes, dehan iha nia kna’ar fatin Kampu Alor, ohin.
Nia deklara, kona-ba estoke mamuk ne’ebé SAMES iha, daudaun ne’e kontentór lima tama ona iha portu Dili, entaun ida ne’e bele rezolve ona problema sira ne’e. Maibé pedidu sira husi fasilidade saúde tama SAMES kontinua halo distribuisaun.
“Normalmente ai-moruk sira ne’ebé mak tama mai ne’e ai-moruk sira ne’ebé mak liuhosi lista esensiál medikamentu nian ne’ebé utiliza iha teritóriu nasionál”, nia esplika.
Vise Ministru Saúde Bonifacio Maucoli dos Reis, dehan ai-moruk mamuk iha armajen SAMES tanba dala barak ró sira atraka tarde, entaun ida ne’e mosu estoke mamuk.
“SAMES mak durante ne’e halo akizisaun ba ai-moruk sira, entaun ai-moruk balun tama no balun ikus tanba ró mak atraka tarde, maibé ida ne’e ita kontinua halo distribuisaun ba fasilidade saúde sira tanba dala balun failansu barak mosu iha sentru saúde sira la halo pedidu, entaun ami orienta nafatin diretór sira tau atensaun másimu banhira ai-moruk la iha tenke halo pedidu no halo kedas distribuisaun, atu nune’e evita estoke mamuk iha fasilidade saúde sira.
Jornalista : Felicidade Ximenes
Editór : Zezito Silva
