Governu Japaun no Timor-Leste asina kontratu ba projetu haat
DILI, 08 fevereiru 2023 (TATOLI)— Ministru Obra Públika (MOP), Abel Pires, hateten, Governu Timor-Leste no Japaun liuhosi Ajénsia Koperasaun Internasional Japaun (JICA) asina ona kontratu ba prosesu reabilitasaun infraestrutura ne’ebé hetan estragu hosi inundasaun loron 04 abril 2021.
“Ha’u foin vizita Japaun foin lalais ne’e. Iha vizita ne’e ami asina kontratu ne’ebe apoiu hosi JICA ba projetu haat hodi halo reabilitasaun ba infraestrutura ne’ebé hetan estragu hosi kalamidade 04 abril 2021. Reabilitasaun ne’e sei halo ba moru protesaun hahú hosi mota Comoro to’o ba to’o mota ulun Casnafar nian, reabilitasaun estrada Rontunda Nicolau Loubato ba to’o Raicotu no irrigasaun rua mak sei halao iha minisipíu Manatuto no Bobonaro,” Abel Pires hateten ba Tatoli iha Palásiu Governu, Dili, kuarta ne’e.
Notisia relevante : Governu verifika no ajuda vítima inundasaun muda ba fatin provizóriu
Membru Governu ne’e dehan, orsamentu ba projetu haat ne’e ho nia montante hamutuk milliaun $8.
“Ita agradese ba apoiu ne’ebé ita simu hosi Japaun liuhosi JICA tanba apoiu ida ne’e gratuita, no prosesu implementasaun ba projetu ne’e, sei hahú iha tinan ne’e,” nia hateten.
Jornalista : Arminda Fonseca
Editora : Armandina Moniz
