UN Women formaliza servisu ho MI apoia feto iha TL
Dili, 08 fevereiru 2023 (TATOLI) – Vise-Ministeru Interiór (MI), António Armindo, asina akordu ho UN Woman ba implementasaun Planu Asaun Nasionál Rezolusaun Konsellu Seguransa Nasaun Unida (PAN-RKSNU) 1325, kona-ba Feto, Dame no Seguransa, faze daruak iha Timor-Leste.
Xefe UN Woman iha Timor-Leste, Amy Nishtha Satyam, hateten akordu ne’e formalizadu no sei kolabora Governu hodi reforsa atu hapara violénsia hasoru feto no labarik feto sira.
“Ohin ita halo serimónia asina akordu ne’ebé ho Ministériu Interiór hodi bele dezenvolve no hametin di’ak liután Planu Asaun Nasionál 1325 iha prevensaun no rezolusaun konflitu sensível ba jéneru, prevensaun ba tráfiku umanu inklui hasa’e konsiénsia ba redusaun síklu violénsia hasoru feto no labarik feto inklui empodera feto sira iha prosesu foti desijaun tanba feto mós sai hanesan autór xave iha prosesu dame partikularmente iha nasaun ida ne’e”, Amy Satyam dehan hafoin realiza serimónia iha edifísiu MI, Vila-Verde, ne’ebé Tatoli asesu liuhosi nota imprensa, ohin.
Nia dehan, akordu ida ne’e halo tanba MI nu’udar instituisaun prinsipál hodi asegura seguransa no protesaun públiku iha Timor-Leste.
“Ita hotu hatene katak Ministériu Interiór apoiu mandatu UN Women nian hanesan prevé ona iha Rezolusaun Asembleia Jerál Nasaun Unida nian 64/289 no Planu Estratéjiku UN Women nian hodi hametin protesaun no seguransa ba feto, labarik-feto no grupu vulnerável sira iha Timor-Leste no promove partisipasaun no lideransa feto sira-nian iha pás no seguransa ne’ebé kompletu, signifikativu no hanesan”, nia relata.
“Aleinde ne’e Ministeriu Interiór nu’udar mós instituisaun xave hodi lidera PAN 1325, inklui Planu Asaun Nasionál sira seluk ne’ebé iha korelasaun ba malu, hanesan PAN VBJ (Violénsia Bazea ba Jéneru), relatóriu monitorizasaun ba implementasaun CEDAW (Committee on the Elimination of Discrimination against Women) inklui papél hodi kombate no prevene tráfiku umanu iha Timor-Leste”, nia salienta.
Entretantu, Vise-Ministru Interiór Antonio Armindo, kongratula UN Woman nu’udár parseria Ministériu Interiór nian no-mos ba ema hotu ne’ebé mak envolve a’an iha dezenvolvimentu Planu ne’e nian.
“Aproveita oportunidade ne’e hakarak hato’o agradese ba UN Woman ne’ebé nafatin apoiu Planu foun hodi fó rekoñesimentu ba feto nia papél fundamentál iha prosesu konstrusaun Estadu no nasaun hodi dezenvolve no hametin di’ak liután Planu Asaun Nasionál 1325 ba faze daruak iha Timor-Leste.
Tanba ne’e, Governu nia kompromisu hodi mantein haburas dezenvolvimentu responsível ba jéneru, hodi bele kumpre mandatu no espíritu rezolusaun 1325, ba prevensaun konflitu
Governante ne’e sei tau fiar ba Sekretariadu PAN 1325 nian ne’ebé tutela Ministériu Interiór nia okos hodi lidera koordenasaun no implementasaun jerál, monitorizasaun no relatóriu PAN 1325 nian no asegura kolaborasaun ne’ebé koordena no efetiva ho liña ministériu no partisipante sira seluk no organizasaun sosiedade sivíl sira iha estrutura PAN 1325 nia-laran.
Jornalista: Hortencio Sanchez
Editór : Zezito Silva
