CDTL sorumutu ho treinadór modalidade hitu ne’ebé selesionadu ba SEA Games
DILI, 09 fevereiru 2023 (TATOLI) – Konfederasaun Desportiva Timor-Leste (CDTL-sigla portugés) liuhosi segundu Vise Prezidente hanesan mós Prezidente Komisaun Integradu Preparasaun SEA Games Kamboja 2023 Zeferino Viegas Tilman, sorumutu ho treinadór modalidade hitu ne’ebé selesionadu ba SEA Games hodi husu kona-ba prosesu preparativu modalidade ida-idak nian.
“Ohin ita halao enkontru ida ho treinadór hosi modalidade hitu ne’ebé ita hili atu ba partisipa iha SEA Games tinan ne’e, ita atu husu kona-ba sira nia planu no preparasaun sira hotu to’o ona iha ne’ebé, tanba sira tenke prepara hahú agora to’o 01 maiu bainhira aranka ba Kamboja”, Zeferino dehan ba Agência TATOLI iha Jináziu Dili, ohin.
Nia informa, rezultadu enkontru ne’e hatudu sinál pozitivu tebes tanba treinadór hotu aprezenta programa no planu treinamentu di’ak tebes.
Iha reuniaun ne’e partisipa de’it treinadór hosi modalidade lima hanesan, Boxe, Karate-do, Taekwondo, Voleiból Praia, Atletizmu, enkuantu Futeból no Siklizmu la marka prezensa tanba okupadu ho servisu esensiál balun.
Tanba ne’e, ekipa CDTL sei hakbesik aan ba modalidade rua ne’e hodi buka hatene kona-ba sira nia programa no planu treinamentu ba atleta nian nune’e bele ajusta hamutuk programa no planu modalidade ida-idak nian liu-liu iha treinamentu ba atleta sira.
Iha okaziaun ne’e treinadór hosi modalidade Boxe Abilio Orlando dos Santos, hateten reuniaun ne’e koalia liu kona-ba ajendamentu no programa treinamentu ba atleta sira nian aprezenta ba CDTL.
“Ohin ami mai aprezenta planu no programa treinamentu nian ba CDTL, oráriu sira mak hanesan dader loraik halo treinamentu ne’e, gráfika preparasaun fulan hira ba kotuk to’o maiu ne’e, ne’ebé ohin ami aprezenta hotu ona”, Abilio refere.
Nia rekorda, prosesu treinamentu ba Boxe, daudaun ne’e la’o másimu tebes no oráriu treinu segunda to’o sesta hahú dader no loraik iha Benfica Dili.
“Treinamentu ami nian la’o di’ak hela, kondisaun atleta sira mós daudaun ne’e di’ak hotu hela”, nia hakotu.
Jornalista: Hortencio Sanchez
Editór : Zezito Silva
