Delegasaun Timor-Leste partisipa Konferénsia Bali Process iha Australia
DILI, 09 fevereiru 2023 (TATOLI) – Timor-Leste reprezenta husi Vise-Ministru Interiór, Antonio Armindo, hamutuk ho delegasaun partisipa Konferénsia Bali Process ba da-18 hodi diskute kona-ba konsekuénsia husi kontra bandu, tráfiku ema no krime tranzasional nian ne’ebé hala’o iha Adelaide-Australia.
“Ohin ita ho delegasaun hosi Timor-Leste partisipa iha oitavu Konferénsia Ministerial Bali Process on People Smuggling, Trafficking in Person and Related Transnational Crime 2023 paralelu ho Senior Oficial Meeting (SOM), ba dala 18, hodi hasa’e konsiénsia efetivu rejionál nia kona-ba konsekuénsia husi kontra bandu, tráfiku ema no krime tranzasionál nian”, Vise-Ministru Interior, Antonio Armindo, dehan liuhosi komunikadu ne’ebé Agência TATOLI asesu ohin.
Nia dehan, konferénsia ida ne’e lidera hosi Guvernu Australia ho membru hamutuk 48 resin, inklui UNHCR, IOM, UNODC no mós nasaun membru observadór sira no organizasaun internasionál sira relevante, Inklui mós grupu Ad Hoc, hodi rezolve kontra bandu espesífiku, tráfiku umanu no migrante irregulár iha kada rejiaun.
“Bali Process hanesan forúm dialogu politiku, fahe informasaun no kooperasaun prátika atu ajuda rejiaun hodi rezolve dezafiu sira. Estratejia Bali process ba kooperasaun inklui programa atividade servisu ba oin, ajuda Bali process nia servisu atu implememnta prioridade tuir diresaun ministru sira nian”, nia subliña.
Governante ne’e garante katak ho forúm ida ne’e bele kontribui hodi kombate movimentu irregular ema nian iha rejiaun Bali Process liuliu iha Timor-Leste, hodi ajuda kualidade dezenvolvimentu, konsistente no enkuadramentu migrasaun nian sai di’ak liután.
“Iha tinan 2023 forúm ida ne’e foka liu iha area kooperasaun prinsipál 8 mak aplikasaun lei ne’ebe eziste entre nasaun membru, hametin kooperasaun ho parte interessada sira, promove fahe informasaun ba públiku entre nasaun membru, kontribui hodi kombate movimentu irregulár ema nian hakat liu fronteira, ajuda kualiadade hodi haforsa jestaun fronteira, ikus liu halo koordenasaun hodi hetan apoiu”, nia hakotu.
Konferénsia internasionál ne’e Vise-Ministru Antonio Armindo, hetan akompañamentu hosi Adjuntu Diretór Jerál Servisu Migrasaun, Inspetora Xefe Polísia, Adelaide da Rosa, Xefi VPU Nasionál, Inspetór Polísia Ricardo da Costa, no-mós ofisiál sira investigasaun PNTL no Servisu Migrasaun.
Jornalista: Hortencio Sanchez
Editór : Zezito Silva
